అవధానిగారితో పరిచయం--అనుకోకుండా పరిచయమయ్యారు రావి ఎన్. అవధానిగారు. ఇటీవలే పరిచయమైన ఆయన రోజులో ఏదో సమయంలో ఫోన్లో మాట్లాడటమో లేక మెసేజ్ ద్వారా పలకరించడమో జరుగుతోంది. నిన్న ఆయన మా నాన్నగారితో పరిచయం నాటకీయంగా జరిగిందన్నారు. ఆ విషయాన్నే ఇక్కడ ఇస్తున్నా....ఆయన విజయనగరం నుంచి ఆఫీస్ పని మీద మద్రాసుకోసారి వచ్చినప్పటి మాటిది. బహుశా 1964 ప్రాంతం కావచ్చు.టీ.నగర్లో నటేశ్ అయ్యర్ వీధిలో ఉంటున్న తన బావగారింటికొచ్చారు. ఆరోజు మా నాన్నగారు మాంబళం రైల్వే స్టేషన్ దగ్గర కూరలు కొనుక్కుంటుండగా రాజరాజేశ్వరీదేవి అమ్మవారిపై మనసులో ఓ పద్యం స్ఫురిం చింది. ఆ పద్యాన్ని అవధానివారి బావగారైన విజయ్ గారికి వినిపించడంకోసం అప్పటికప్పుడు మా నాన్నగారు వారింటికి వెళ్ళారు. పద్యం వినిపించారు. అప్పుడక్కడ ఉన్న అవధానిగారు యథాలాపంగా ఓ మాటన్నారు.అదేంటంటే "కవికీ కంసాలికీ సీసం చాలా తేలికని". అప్పుడు ఆ మాట విని ఆయనెవరని మా నాన్నగారు అడగ్గా విజయ్ గారు "మా బావమరిది" అని పరిచయం చేశారు. మా నాన్నగారి గురించి అవధానిగారికి చెప్పారు. మా నాన్నగారు సీసపద్యంలో అమ్మవారిపై చెప్పడాన్నే అవధానిగారు "సీసం" కవికీ కంసాలికీ చాలా సులువనే అర్థం వచ్చన్నట్లు చెప్పారు. ఆ వ్యాఖ్యను మా నాన్నగారేమీ తేలిగ్గానే తీసుకున్నారు. అవధానిగారు అభివాదం చేయగా మా నాన్నగారు ప్రత్యభివాదం చేశారని అవధానిగారు నాటి సంఘటనను చెప్తూ ఆ విధంగా తమ మధ్య పరిచయం కడదాకా సాగిందన్నారు. ఆయన గురువుగారిగానే భావించేవారు. అవధానిగారు సామాన్యులు కారు. ఆయన రచయితే. రావి ఎన్ అవధానిగా వినుతికెక్కిన ఆయన పూర్తి పేరు రావి నరసింహ అవధాని. 1935 సెప్టెంబర్ 30న జన్మించిన అవధాని గారి తల్లిదండ్రులు శ్రీమతి సూర్యకాంతమ్మగారు, చతుర్వేద పండితులు శ్రీ వేంకట్రామయ్య అవధానిగారు. విజయనగరం మహారాజా కాలేజీలో బి.కాం.డిగ్రీ, చదివిన ఆయన మెటీరియల్స్ మేనేజిమెంటులో డిప్లొమా పొందారు.1993లో ఉద్యోగ విరమణ చేసిన తరువాత ఆయన స్వస్థలం విజయనగరంలో స్థిరపడ్డారు. ఆయన తన 14వ ఏటనే రచనా వ్యాసంగానికి శ్రీకారం చుట్టారు. 1951లో చిత్రగుప్త పక్ష పత్రికలో ప్రచురితమైన "బ్రతుకుతీపి" కథానిక ద్వారా కథా రచయితగా పాఠకులకు పరి చయమైన అవధాని గారు తెలుగు సాహిత్యంలో వెలువడుతున్న దిన, వార, పక్ష, మాస పత్రిక లన్నింటిలోనూ 1951 నుండీ రచనలు చేస్తూనే ఉన్నారు. తెలుగు సాహిత్యంలోని అన్ని ప్రక్రియల్లోనూ రచనలు చేసిన అవధానిగారు 800లకుపైగా కథానికలు, 400లకు పైైగా ఆధ్యాత్మిక వ్యాసాలు, 200లకు పైగా సాహిత్య వ్యాసాలు, 100 కవితలు,.100 బాలసాహిత్య కథలు, నవలలు, నాటికలు రాశారు."ఫేకర్" అనే పత్రికకు పదేళ్ళపాటు సంపాదకత్వం వహించి ఎందరో ఔత్సాహిక రచయితలను ప్రోత్సహించారు. ఈ మాసపత్రికలో తెలుగు, ఇంగ్లీషు, హిందీ రచనలు వెలువడేవి. ప్రస్తుతం ఆయన విప్రవాణి ద్వై మాస పత్రిక సంపాదక వర్గ సభ్యుడిగా ఉన్నారు. ఆయన పొందిన అవార్డులూ రివార్డులూ బోలెడున్నాయి.ఆయన కథానికలపై పరిశోధన చేసిన శ్రీమతి ఆర్.శశికళగారికి ఆంధ్ర విశ్వ విద్యాలయం (విశాఖపట్నం) వారు 2007వ సంవత్సరంలో డాక్టరేట్ ఇచ్చారు.ఆయనతో మాట్లాడుతున్నప్పుడల్లా ఏదో ఒక కొత్త విషయం కళ్ళకు కట్టినట్లు చెప్పడం ఆయనలోని విశేషం.- యామిజాల జగదీశ్


కామెంట్‌లు