MOLAKA--మొలక

ఈ లేఖలతో తెలిసే చలం!--ఉత్తరాలు రాయడంలో చలంగారి తర్వాతే ఎవరైనా అని నా వ్యక్తిగత అభిప్రాయం. నాకు తిరువణ్ణామలై చలంగారినే తెలుసు. ఆంధ్రదేశపు చలం గురించి పుస్తకాలవల్లే తెలుసు. ఎంతమంది వచ్చినా నవ్వుతూ ఆహ్వానించే చలంగారినే నేను చూశాను. ఆయన తిరువణ్ణామలై చేరడంలో ముఖ్యకారకులు చింతా దీక్షితులుగారేనని అందరికీ తెలిసిందే. చింతావారి మాటగానే ఆయన 1936 ప్రాంతంలో మొదటిసారిగా తిరువణ్ణామలై వెళ్ళారు. అయితే ఆంధ్రదేశాన్ని పూర్తిగా విడిచిపెట్టి అరుణాచలం చేరి అక్కడే స్థిరపడి తనువు చాలించింది ఇక్కడే.చలంగారు తనకు ఉత్తరం రాసిన ప్రతి ఒక్కరికీ తిరుగు ఉత్తరం రాసేవారు. రాసిన వ్యక్తి చిన్నవారా పెద్దవారా గొప్పవారా పేదవారా ఇలాటి తేడాల్లేకుండా తానందుకున్న ఉత్తరానికి తప్పని సరిగా ప్రత్యుత్తరం రాసేవారు. అయితే ఆయన అందరికీ రాసిన ఉత్తరాలు వేరు. చింతా దీక్షితులుగారికి రాసిన ఉత్తరాలు వేరు. చలంగారు తమకు రాసిన ప్రతి ఉత్తరాన్నీ దీక్షితులు భద్రపరచడం, ఇంగ్లీషులో రాసిన ఉత్తరాలన్నింటినీ చలంగారు తెప్పించుకుని తెలుగులో ఓపికగా రాయడం విశేషం. ఈ ఉత్తరాలకు 1944 జనవరి ఒకటో తేదీన ముందుమాట తీరులో కొన్ని మాటలు రాశారు. అవి ఇవే....."దీక్షితులుగారు ఈ ఉత్తరాలు దాచారు. ఆయన శ్రమ ఎవరికో ఒకరికన్న ఉపకరిస్తుందని ఆశ - ఈనాడు.ఈ వుత్తరాలన్నీ ఇంగ్లీషులో రాసినవి. చాతకాని చోట్ల తప్ప తక్కినదంతా తెలుగు చేశాను. ఇతరులని గాయపరుస్తాయన్నవీ, అధికార్లని పేరు వరసలుగా తిట్టిన తిట్లూ, రెండు మూడు బూతులు తప్ప తక్కిన విషయమంతా ఉన్నది ఉన్నట్లు తెలిగించాను. ఏమీ interest ఇంటరెస్ట్ ఇయ్యవన్న కొన్ని సంగతులు వొదిలేశాను.ఆయన నాకు రాసిన ఉత్తరాలు దాచని, నా నిర్లక్ష్యం, నా అంధత్వం, అల్పత్వం - క్షమించ తగినవి కావు.ఈ వుత్తరాలలో నేను వెలిబుచ్చిన అభిప్రాయాలు ఆయా నాటివి. ఈ నాటికి చాలళవిషయాల్లో నా అభిప్రాయాలు మార్పు చెందాయి. చెందుతున్నాయి" రావూరి వెంకటేశ్వరరావు (కాంట్రాక్టరు, పాల్వంచ) గారి ఆర్థిక సహాయంతో దీక్షితులకు రాసిన చలం ఉత్తరాలు అచ్చయ్యాయి. 1927 జూలై 4 వ తేదీతో మొదలై 1954 మే 31 వ తేదీ వరకూ రాసిన ఉత్తరాలు ఇందులో ఉన్నాయి. మొత్తం 227 ఉత్తరాల మాలను గుడిపాటి వెంకట చలం శత జయంతి సంఘం (హైదరాబాదు) వారు1995 ఆగస్టులో ప్రచురించారు. అప్పట్లో దీని ధర 35 రూపాయలు. ఇప్పుడీ పుస్తకం అందుబాటులో లేవనే తెలిసింది. ప్రేమికుల మధ్య అసలు పేరుతో సంబోధించక ముద్దు పేర్లతో ఉత్తరం మొదలెట్టడం సర్వసహజం. అయితే చలంగారు దీక్షితులుగారిని సంబోధించిన పేర్లు విచిత్రంగా అనిపిస్తాయి. చలంగారి సంబోధనలలో కొన్నింటిని ఇక్కడ ఇస్తున్నాను. కంపానియన్ ఆఫ్ మై లంగ్స్ అండ్ హార్ట్‌, మై డియర్ పెన్డులం pendulum, ఆపిల్ డియర్ మై ఐ, ఆర్ ఆరేంజ్ ఆఫ్ మై ఇయర్‌ ఆర్ పంపరపనస ఆఫ్ మై నోస్, డియర్ పేపర్ మేకర్, డియర్ హెడ్ ఆఫ్ మఫ్స్, డియర్ లెటర్ హెడ్, మైడియర్ ఫైనాన్షియల్ అడ్వైజర్ టు ది గవర్నమెంట్, డియర్ కరెక్టర్, డియర్ డిప్రెస్డ్ డాడ్‌, డియర్ కో - రెస్పాన్సిబిల్ ఆఫీసర్ ఇలా రకరకాలుగా దీక్షితులవారిని సంబోధిస్తూ చలంగారి ఉత్తరాలు సాగాయి. అలాగే చలంగారు రాసిన ఉత్తరాలలో కొన్ని మాటలు....చాలా బాధ పడ్డాను. ఇంకా బాధ పడుతున్నాను. ఏదీ తృప్తి పరచదు. ఏదీ నాకు సంతోషాన్నివ్వదు. నెప్పి. నెప్పి నెప్పి. శరీరంలో హృదయంలో.సౌరిస్ కి వొచ్చిన కల రాశాను కదా. లీలగారి కళ్ళల్లో నన్ను చూస్తే తప్ప యీ బాధ యీ శ్రమ తగాదా వృధా అని భగవాన్ నన్ను అన్నట్టు.మళ్ళీ దగ్గరికి వెళ్ళాను. కాని తిరిగి వొచ్చింతర్వాత కూడా ఇదివరకటి స్థితిలోనే వున్నాను.ఏం చెయ్యాలో తెలీటం లేదు. ఇట్లా నన్ను ఉపేక్ష చెయ్యడంలో భగవాన్ కి ఏదో వుద్దేశ్యం వుందని నమ్మడానికి ప్రయత్నిస్తాను. నేను నిస్సహాయుణ్ణి. ఇది ఏదీ ఏదీ కూడా నాకు శాంతినివ్వలేవు. ( 1946 ఫిబ్రవరి 1 న రాసిన ఉత్తరంలోని కొన్ని మాటలవి).నిన్న రాత్రి భగవాన్ కలలో కనపడ్డారు. మీరూ నేనూ ఇంకోరు ఎవరో భగవాన్ తో వున్నాం. ఆశ్రమం ఖాళీగా ఉంది. భగవాన్ దిళ్ళు కూడా మాయమౌతున్నాయి. నేనన్నాను. భూమిమీద భగవాన్ చెయ్యవచ్చినపని ముగుస్తోంది. ఎవరికి ఏమి చెయ్యాలో ఆయన దాన్ని చేసి ముగించారు. ఆయన వెళ్ళిపోవాలి. మనం మాత్రమే మిగిలాము. 'Let us hasten' లెటజ్ హాసెన్ అన్నాను. అని నేను ఒక వార్తాపత్రికలాగు మడత పడుతున్నాను. నిజంగా ఒక కాయితమై పోయి, ఆయన చేతుల్లోకి నన్ను నేను ఇచ్చేసుకున్నాను. ( 1947 జనవరి 8న ఏలూరు నుంచి మై డియర్ లిటిల్ డూ వెల్ అని సంబోధిస్తూ రాసిన ఉత్తరంలోని మాటలవి).వావిలాల సుబ్బారావుగారన్నారీ పుస్తకం పీఠికలో... "రమణ మహర్షి చలం జీవితంలో ప్రవేశించే వరకు చలంగారిలోని సంక్షోభానికి ఊరట ఆదరం లభించింది దీక్షితులుగారి చలువ పందిట్లోనే. కల్లోల చలంగారికి ఆదరాన్నే గాని సమాధానం ఇవ్వలేని దీక్షితులుగారు భగవాన్ని చూపించి పక్కకు తప్పుకున్నారు. అదీ చలంగారి జీవితంలో దీక్షితులుగారి పాత్ర" అని రాశారు. చలంగారి జీవితంలో పెనుమార్పు తీసుకొచ్చింది తిరువణ్ణామలై పర్యటన, భగవాన్ రమణ మహర్షి దర్శనం. ఈ మార్పులను తెలుసుకోవాలంటే దీక్షితులుగారికి రాసిన ఈ పుస్తకాన్ని చదివితే చాలు. ఆయన గురించి ఎవరెవరో ఏవేవో అన్న మాటలకు ఈ ఉత్తరాలను ఓ జవాబుగా చెప్పుకోవచ్చని నా అభిప్రాయం.- యామిజాల జగదీశ్