ఏకాంతసేవ: --మా నాన్నగారి పందొమ్మిదో ఏట ఓరోజు మా తాతగారింట భాస్కర రామాయణం పురాణకాలక్షేపంగా శ్రీ కట్టమూరి రామమూర్తి శాస్త్రిగారు శివకేశవుల గురించి చెప్పారు. అది వింటున్న మా నాన్నగారికి తోచిన భావాలు పద్యరూపంలో పెల్లుబికాయి. కాలక్రమంలో విజయనగరంలో విద్యార్జన పూర్తి చేసుకుని ఏవేవో రాస్తూ ఉండేవారు. తర్వాతి రోజుల్లో మా నాన్నగారు ఉపాధ్యాయవృత్తికోసం మద్రాసు చేరారు. ఓరోజు పాత కాగితాల కట్టలు తిరగేస్తుండగా శివరాంపురంలో పందొమ్మిదో ఏట రాసిన చిన్న పుస్తకాన్ని చెదలు కొరికి శిథిలావస్థలో కనిపించింది. అప్పటికీ అది చూడడంతోనే ఆయనలో ఓ ఆనందం. చిన్ననాటి కవిత కదా...ఎంత చక్కగా ఉందో అనుకున్నారు మనసులో. ఆ పద్యాలను మరొక పుస్తకంలో కాపీ చేస్తూ ఓ మాటన్నారు "ఆ తర్వాత రాసిన గ్రంథాలలోని పద్యాలకన్న ఇవి ఎంతో ఇంపుగా ఉన్నాయిరా" అని! ఆయనలో అదో సంతృప్తి. అప్పట్లో ఎంతవరకు రాశారో అక్కడివరకే దానికి శుద్ధ ప్రతి తయారు చేసి శ్రీవేంకటేశ్వరస్వామివారి అనుగ్రహంతో ఏకాంతసేవ అనే శీర్షికతో పుస్తకం అచ్చొత్తించి తన కోరిక నెరవేర్చుకున్నారు. ఈ పుస్తకంలో కృతి సమర్పణ పద్యం మాత్రమే కొత్తది. మిగిలినవన్నీ ఆయన చిన్ననాటి పద్యాలే. 1980 ఫిబ్రవరిలో ఈ పుస్తకం క్రాంతి ప్రెస్ లో అచ్చయింది. ఇరవై నాలుగు పేజీల ఈ ఏకాంతసేవ పుస్తకం ధర అప్పట్లో ఒక్క రూపాయే. ఇందులోని ఓ పద్యం.... "కలికి కన్నుల నవ్వులొలుకు చూపుల తళ్కు/ భువన సంభవ మంత్రములు పఠింప/ తలిరుటాకులబోలు తాటంకముల రుచుల్/ తొగరు వాతెర నిగన్నిగల బెంప/ నీలంపు ముంగురుల్ నిడుద వాల్జడ టెక్కు/ కందర్ప సామ్రాజ్య గరిమ చాట/ శింజాన నవమణీ మంజీర నాదమ్ము/ రాయంచలకు నొయారమ్ము నెరప/ విరుల నెగరువ్వు నగవు, పెన్నురము బిగువు/ అడుగు తమ్ముల తీరు, నెన్నడుము సౌరు/ ప్రకృతి తత్వము బోధింప భామయైన/ శ్రీరమాకాంతు నెరుగవేశ్రీమహేశ! (మా నాన్నగారి జ్ఞాపకపుటలలో ఈ చిరుకథనమొకటి) - యామిజాల జగదీశ్