మహామనీషి ----------------- ఓ మనిషిని దేనితో అంచనా వేయాలి? అతను సంపాదించిన డబ్బులతోనా?అతను కూడబెట్టిన ఆస్తులతోనా? ఇవేవీ కాదంటాడో కవి.... అతని అస్తమయమప్పుడు ఎన్ని కన్నీళ్ళు పొందేడా అనే దాంతో ఆ మనిషెంతటి వాడో తెలుస్తుందంటాడు..... ఆయన శాస్త్రవేత్తని కన్నీరు కార్చలేదు ఆయన రాష్ట్రపతిగా ఉన్నవారనీ కన్నీరుమున్నీరవలేదు ఆయనొక మహామనీషి అని కన్నీటి అంజలి సమర్పించారు బాష్పాంజలి అర్పించడానికి ప్రజలు స్వచ్ఛందంగా తరలివచ్చారు బలవంతంగా ఎవరినీ తీసుకురాలేదు తామంతట తామే దుకాణాలు మూసేసి సంతాపం తెలిపారు ఎవరూ ప్రాణాలు తీసుకోలేదు ఎవరూ బస్సులు తగలబెట్టలేదు బందోబస్తు సాధారణమే ప్రశాంత వదనాలతో అంజలి ఘటించారు ఓ మహామనీషి కాబట్టే ఇలాంటి మౌనాంజలి సాధ్యమైంది ఇటువంటి అంజలి మరెవరికైనా దక్కుతుందా అనేది ప్రశ్నార్థకమే సహజంగా గురువులు ప్రశ్నలడిగితే శిష్యులు జవాబు చెప్తారు కానీ ఆయన అదే కలాంగారు గురువై ఉండీ ప్రశ్నలడగండి జవాబులు చెప్తానని మరీ మరీ ప్రశ్నలు అడిగించుకున్న విభిన్న గురువు కలాంగారు... ఓ విద్యార్థిని అడగింది శాస్త్రవేత్త తమిళుడు భారతీయుడు మనిషి వీటిలో దేనికి అగ్రస్థానం ఇస్తారని....?? అందుకాయన చెప్పిన జవాబు... మనిషికే అగ్రతాంబూలం మిగిలిన మూడూ అందులో కలిసున్నాయని!! అందుకే మీర్జా గాలిబ్ ఓ చోటన్నాడు మనిషిగా పుడితే సరిపోదు మరణించేలోపు ఇతనూ మనీషి అంటే అని కనీసం ఒక్కరితోనన్నా అనిపించుకోగలగాలి అప్పుడే జీవితం సార్థకమవుతుందని పత్రికలన్నీ ముఖచిత్రంగా వేసేవి హీరోయిన్ ఫోటోలు హీరోల ఫోటోలు ఈ ఇద్దరు కాదనుకుంటే రాజకీయ నాయకులు ఎందుకంటే ఈ ముగ్గురేగా మనకు ఆదర్శవంతులు అయితే కలాం పోఖ్రాన్ అణుపరీక్షలు విజయవంతమై అగ్రదేశాలకు ఓ హెచ్చరికైనప్పుడు కలాం అంటే ఎవరో కళ్ళు తెరచి పత్రికలన్నీ ఆయన ఫోటోలు ప్రచురించాయి అప్పటి వరకూ నటీనటుల ముఖచిత్రాలను వేసిన పాపానికి ప్రాయశ్చిత్తంగా కలాం ఫోటోలతో పత్రికలను సింగారించాయి రాష్ట్రపతి భవన్ ఆవరణలో అనేకానేక పువ్వులూ పరిమళాలూ వాటి గురించి కలాం ఓ కవిత రాశారు ఓ పిల్ల పువ్వు తల్లో పువ్వుని అడుగుతుంది "మనమెందుకమ్మా పూస్తున్నామని?" అప్పుడు తల్లిపూవంటుంది ఇదిగో అటు చూడు సూర్యుడు ఉదయిస్తున్నాడు అదిగో అటు చూడు పక్షులు నింగిలో విహరిస్తున్నాయి గాలి వీస్తోంది మనం వికసిస్తున్నాం ఇవన్నీ ప్రకృతి ధర్మాలు మనల్ని చూసైనా మనిషి మృదువైన మనసును అలవరచుకుని మనీషిగా వికసించాలనే ప్రకృతి చేసే సూచన అపై మనిషి ఇష్టం ఖురాన్ భగవద్గీత బైబిల్ తమిళ తిరుక్కురళ్ ఇవన్నీ తనను నడిపించిన మహత్తర గ్రంథాలని చెప్పుకున్న మహనీయుడు కలాం.... (అబ్దుల్ కలాంగారు అస్తమయం తర్వాత ఆయనకు నివాళులర్పించేంందుకు ఏర్పాటు చేసిన కార్యక్రమంలో ఓ తమిళ కవి చేసిన ప్రసంగాన్నే ఇలా వచన కవితగా మలిచాను భావమంతా తమిళ కవిదే నాదొట్టి అనుసృజనే) - యామిజాల జగదీశ్