ఇలా చూడు :-- ఎం.వి. ఉమాదేవి

కొండగోగు పువ్వులలో కనువిందగు రంగు చూడు 

కొండగాలి సుళ్ళు తిరిగి జారే 

కోక కొంగు చూడు !

పిట్ట పిట్ట ముక్కుకలిపే మురిపె

మైన ఊసు చూడు

చెట్టు పుట్టా చిరుజల్లుకు ఒళ్ళు 

పులకరింత చూడు !

ఏరువాక సాగేటి యువరైతు ఆశ చూడు 

నీరు పొర్లి పారేటి యేటి అలల 

సొగసు చూడు !

ముంగిటిలో కొలువుదీరు ముగ్గులలో భవిత చూడు 

రంగులతో మెరుగులద్ధు రమణి 

లేత కరము చూడు !

తీయనైన మాటలాడు కన్నతల్లి 

మమత చూడు 

తీరు తీరు ప్రేమపంచు ఇల్లాలి 

మనసు చూడు !

శ్రమ జీవన సౌందర్యం ఎదనిండే తీరు చూడు 

శాంతి నిండి ఉమ మదిలో

కాంతిరేఖ చూడు !