సూరీడు బెదిరింపులు మణిపూసలు :--ఎం.వి. ఉమాదేవి నెల్లూరు

ఎండ మండి పోతున్నది 

వెలుతురేమొ బాగున్నది 

సూరీడువి బెదిరింపులు 

లోకం భయ పడుతున్నది !

వేకువనే చల్ల గాలి 

అంతలోనె వేడి మసలి 

పక్షులన్ని హడావుడిగ 

మేత కొరకు గూడు వదలి !

 గృహిణి లేచి పని తొందర

నీళ్ళు పట్టు పని ముందర 

వచ్చి పోవు కరెంటుతో 

ప్రతినిమిషము అతి విసుగుర!

కూరల ధర ఆకాశము 

పాలు పెరుగు అతి ముఖ్యము 

చల్లని నీరు త్రాగినా 

తీరలేదు ఈ దాహము !

 చెమటపోసి ఆరి ఆరి 

దురదలొచ్చి గీరి గీరి 

చెమటకాయ మేని తరువు 

గంధపుపొడి నూరి నూరి !

ఆవకాయ సందడిగా 

వడియాలను ముందరగా 

ఉప్పుమిర్చి మరచిపోకు 

వానల్లో సాయంగా !

సూర్యశక్తి బహుగొప్పది 

 క్రిములచేయు నాశనమిది 

వాడుకొనుట ఎంత మేలు 

కులవృత్తుల చేయూతిది !

 రజకులకీ పనికాలము 

రైతుకి పరీక్ష కాలము 

కుమ్మరి చేతిన ఆవము 

కమ్మరి మరమ్మతు విధము !

అగ్ని వస్తువుల భద్రత 

పప్పు దినుసులకు శుభ్రత 

వేసవిలో జాగ్రత్తలు 

మల్లెలు,ముంజలు లభ్యత !

ఋతువులు మనకే సాయము 

సాగుతూ వ్యవసాయము 

సూరీడును వాడుకొనుట 

మనిషికి ఎంత ఉపాయము !

విద్యుత్తును తానిచ్చును 

విద్వత్తును బహు పంచును 

ప్రకృతిలో పరిపూర్ణతయె 

భానుడు తానే ఇచ్చును !

నమస్సులు రవి వెలుగులకు 

ఉషస్సులు కవి భావనకు 

సమస్త విశ్వమూలముకు 

తేజస్సులు రవి శశిలకు !