*వస్తారా?*:-:- డా.గౌరవరాజు సతీష్ కుమార్.

బాలల్లారా రారండి - 

బాగా అల్లరి చేద్దాము

బాలల్లారా రారండి - 

బుద్ధికి పదును పెడదాము

!!బాలల్లారా!!

బస్సు ఎక్కీ వస్తారా? - 

బాలల పండుగ చేద్దాము

ఆటో ఎక్కీ వస్తారా? - 

ఆటలు ఎన్నో ఆడుదము

పడవ ఎక్కీ వస్తారా? - 

పాటలు ఎన్నో పాడుదము

కారు ఎక్కీ వస్తారా? - 

కథలు ఎన్నో విందాము

వ్యాను ఎక్కీ వస్తారా? - 

వానలొతడిసి తిరుగుదము

!!బాలల్లారా!!

రథము ఎక్కీ వస్తారా? - 

రాజుగారి తోటకు వెళదాము

బండి ఎక్కీ వస్తారా? - 

బంతి పూవులు కోద్దాము

గుర్రము ఎక్కీ వస్తారా? - 

గుడికి మనము వెళదాము

స్కూటరు ఎక్కీ వస్తారా? - 

స్కూలుకు మనము వెళదాము

లారీ ఎక్కీ వస్తారా? - 

లెక్కలు అన్నీ చేద్దాము

!!బాలల్లారా!!

ఏనుగు ఎక్కీ వస్తారా? - 

ఎక్కడికైనా వెళదాము

జట్కా ఎక్కీ వస్తారా? - 

జూకు వెళ్ళి చూద్దాము

రైలు ఎక్కీ వస్తారా? - 

రైతుల పనులు చూద్దాము

సైకిలు ఎక్కీ వస్తారా? - 

సైనికుల కవాతు చూద్దాము

స్టీమరు ఎక్కీ వస్తారా? - 

స్టీలు ఫ్యాక్టరి చూద్దాము

!!బాలల్లారా!!