**ఏడు దశాబ్ధాల భారతం**:-**సాగర్ రెడ్డి****చెన్నై**

బిక్షకోసం యాచకుల

ఆరాటంకాదు ఆ పోరాటం.

ఫిరంగులమోతలకు

తుపాకీగుళ్ళ చప్పుళ్ళకు

భయపడని పోరాటమది.

 అందరినీ కదలించి,

అంతులేని కర్కశత్వాన్ని

అంతంచేసిన సమిష్టి

స్వాతంత్ర్య పోరాటమది!!

హింసతో విలవిలలాడినా-

ప్రాణాలు గాలిలో కలసినా,

పట్టువీడని పంతమై

బానిస సంకెళ్ళను

తెంచిన ఉద్యమమది.

వందల వత్సరాల అవిశ్రాంత యుద్దానికి

అందిన ఫలితమే ఈ స్వాతంత్ర్యం, 

ముందు తరాలు మనకు అందించిన స్వాంతనా మంత్రం!!

ఏడు దశాబ్ధాలు దాటాయి,

అంచెలంచెల ఆ పోరాటానికి-

సఫలీకృతమైన అపూర్వ ఘట్టానికి.

అబివృధ్ధి చెందినా,

ఆనందించలేని ఆధిపత్య

పోరాటాలతో నిత్యం

సతమతమయ్యే 

ఆవేదనతో

నేడు వేడెక్కుతోంది

స్వతంత్ర భారతావని!!

అన్నంపెట్టని ఆవేశాలు,

అంతకంతకు పెరుగుతున్నాయి-

పుంతలు త్రొక్కే అవినీతి

మర్రిచెట్టు ఊడలా,

దశ, దిశలా వ్యాపించి

దేహంలాంటి దేశాన్ని

జీవచ్ఛవం చేస్తుంది!!