శివ స్మరణ ;-మచ్చ అనురాధ--యస్.ఏ.తెలుగు

ఉత్పలమాల పద్యాలు

అంతట నిండి యుంటివిల నంబ మనోహర నాదిదేవుడా! 

యెంతటి మాయ కారివయ , యేమని యందును  నిన్ను జూచినన్ 

చెంతన యుండె భక్తులను జేరియు గొల్వ మోదమొందవే 

మంతన మందు నింతయును మౌనము వీడక యుందువె ప్పుడున్  .

శూలము బట్టి శత్రువుల స్రుక్కడ గించెడిదేవ రుద్రుడా! 

కాలము దాల్చి కంఠమున గంగ జటాధర గౌరి వల్లభా! 

నీలపుకందరా! సుగుణ నిన్నిల మించిన దైవమేదిరా! 

యేలగ రావదేల శివ  యెన్నియొ పూజలు జేయుచుంటిరా! .

శంకర నిన్ను నమ్మి తిని శాంభవి  వల్లభ మోక్ష ప్రాప్తి కై 

తంకము జూపకుండనను దాపున జేర్చుము బోళ శంకరా!

పంకజ లోచనుండ కడు పావనమూర్తివి  పాహి పాహి ,నా

పంకము  బాపి శోకమును  పారగ జేయుము నీలకంధరా! .

ఎంతటివారికైననిల యీశ్వర నీపద సేవజేయగన్

చింతలు పారద్రోలెదవు జీవిత మంతయు  కాపుగాచియున్ 

వింతల   నెన్నియో కనుల వీక్షణ జేసి విరక్తి ‌నొందితిన్  

నంతము నందు  చేకొనియు  హాయిని  గూర్చెదవీవు శంకరా! .

జంగమ దేవరాయలన చంకన జోలెయు వేసుకొందువే 

లింగమ రూప శంకరుడ లీలలు తెల్యగ మాకు శక్యమే! 

గంగ మనోహరా!  హరుడ గావగ రమ్మిక  నాగభూషణా!

సంగమ రూప సాంబశివ సన్నుతి జేసెద నామనంబునన్ .

=====================

మచ్చ అనురాధ

యస్.ఏ.తెలుగు 

జి.ప.ఉ.పా.కుకునూర్ పల్లి, కొండపాక మండలం, సిద్దిపేట జిల్లా.