సుదామా శ్రీ కృష్ణ
కన్నయ్య తో చెలిమి
చెలిమి ఎంతో బలిమి
బలిమినిడి బంధమే సుదామకి ఓ వనజ
సాందీప మునిచెంత
చెంత చదివేనెంత
చదువులో స్నేహమే ఒదిగింది ఓ వనజ !
పేద విప్రుడు ఒకరు
ఒకరు యాదవచిగురు
చిగురుమొగ్గలు తొడిగి స్నేహవనమో వనజ !
ఆరాధనా క్రమము
క్రమము బాల్యపు సమము
సమముగనె కడవరకు నిలిచింది ఓ వనజ !
చిరుగు చేలము గట్టి
కట్టి సంతును బట్టి
బట్టి సాయము నడుగ వెళ్ళేను ఓ వనజ !
మిత్రునికి కానుకగ
కాన్క ఏమని ఎరుగ
ఎరుగగుప్పెడు అటుకులే దొరికె నిక వనజ !
రాచ నగరుకు చేరి
చేరి కృష్ణుని కోరి
కోరి అంతఃపురము ఆదరణయే వనజ !
ఎదురొచ్చి వేణుధర
వేణువై మ్రోగెనుర
మ్రోగు హృదయం తోటి మోదమున ఓ వనజ !
మిత్రమా కుశలమా
కుశలమ్ము చెప్పుమా
చెప్పుమని పాదపూజ చేసెను ఓ వనజ !
భోజనం భాజనము
భాజనo రాజసము
రాజమర్యాదలవి చేసేను ఓ వనజ !
వీవెనలు వీచేరు
వీచ రాణులు వీరు
వీరునూ ముచ్చటగ మురిసేరు ఓ వనజ !
నాకేమి తెచ్చితివి
తెచ్చి దాచిన వేవి
ఏవి యని చేలమ్ము విప్పెహరి ఓ వనజ !
తీయనివి అటుకులును
అటుకులే అందుకొను
అందుకొని ఆశగా తినుచుండి ఓ వనజ !
మూడు గుప్పిళ్ళనే
మించకనె ఆపెనే
ఆపేసి రుక్మిణియు మర్మమున ఓ వనజ !
ఐశ్వర్య మందినది
అంది శుభమిచ్చినది
శుభములే స్నేహంగ నిలిచేను ఓ వనజ !
addComments
కామెంట్‌ను పోస్ట్ చేయండి