వనితలతొ వరి నాట్లు
నాట్లు వేసిరి ఇట్లు
ఇట్లు వ్యవసాయమ్ము చేసేరు ఓ ఉమా !
నారు కట్టలు గట్టి
గట్టిగా చేపట్టి
చేపట్టి వరసలుగ నాటుదురు ఓ ఉమా !
మడమ లోతున నీరు
నీటిలో మసిలేరు
మసులుతూ మంచిపని అందుకొను ఓ ఉమా !
చిక్కు కున్నది పంట
పంట వేయుట తంట
తంటయిన రైతన్న మానడే ఓ ఉమా !
మూడు నెలలకు సాగు
సాగునే వరి పోగు
పోగయిన వరికుప్ప మురిపించు ఓ ఉమా !
వంట చేసిన చేయి
చేయి పంటలనోయి
పంటలో కడవరకు వనితలే ఓ ఉమా !
కూలీల అన్నాలు
అన్నములతొ గంపలు
గంపలో ఘుమఘుమల వడ్డించు ఓ ఉమా !
అరిటాకు భోజనము
భోజనం సుందరము
సుందరమె తాటాకు రేకలే ఓ ఉమా !
బాగుంది.మద్దినేల అన్నం తినేదానికి రేకలు కట్టుకోవడం గుర్తు చేశారు.
addComments
కామెంట్ను పోస్ట్ చేయండి