|| బరువెక్కిన గుండె ||;-మచ్చరాజమౌళి దుబ్బాక 9059637442

ఇంకిపోయిన కన్నీళ్ళను మోస్తూ

చెప్పలేని నిజాలను రెప్పలకింద దాస్తూ

విప్పుకోని సంకెళ్లను నడిపిస్తూ

అడుగుపడని నడకలతో 

అగుపించని చూపులతో

ఒడిదుడుకుల పెనుగులాటల సంద్రంలో ఈదలేక 

కఠిన పాషాణమైన గుండె బరువెక్కింది

క్షణాలన్నీ భయపెడుతున్నాయి

టకటకమని నీటిచుక్క శబ్ధం చేస్తున్నట్టు

వెలుతురును తరుముతూ చీకటీ

చీకటిని చీల్చాలని వెలుతురూ

తెగ ఉత్సాహం చూపిస్తున్నాయి 

గుండె పొరలను 

ఎన్ని ఘటనలు చిధ్రం చేశాయో

రక్త నాళాలు 

ఎంతటి రంపపుకోతకు గురి అయ్యాయో

చిదిమేసిన చమట చుక్క

మది నుదుటిరాతను మలిపేసిందేమో

ప్రతి చిన్న శబ్ధం 

ప్రళయం సృష్టించేదిలా అనిపిస్తుంది

తోడుగ సాగే నీడగూడా

ముందూ వెనుకా చూడక భయపెడుతోంది

చుట్టూ అందరూ ఉంటారు

తనే చిక్కని చీకట్లో ఉన్నట్లు భావన

గొంతు దాటని మాట

గంభీర స్వరంలా వినిపిస్తుంది

అడుగులు వేస్తున్నా , కాని 

దారికడ్డంగా పూలను తుంచేస్తూ ముళ్ళు 

మసకబారుతున్న చూపును నడిపించుకుంటూ

నా మనసు నన్నెటో తీసుకెలుతోంది.... 

_____