భాష కావాలా చూపు చాలదా +++వారాల ఆనంద్

ఏ కవయినా  

ఏమి రాస్తే ఏముంది 

ఏ భాషలో రాస్తే ఏమవుతుంది  

అందులో 

ఎంత దుఃఖం ధ్వనిస్తే మాత్రం ఏముంది  

అది తన తల్లికే అర్థం కానప్పుడు 

రాసి వున్న కాగితం చేతుల్లోకి తీసుకుని 

అక్షారాల్ని అట్లా దీనంగా చూస్తూ 

ఆ తల్లి కూలబడింది 

నింగికేసీ నేలకేసీ చూస్తూ 

ఇదేమిటో మీకయినా తెలిసిందా అని 

అమాయకంగా అడిగింది 

రాని జవాబుకోసం ఎదురు చూడకుండానే 

కన్నబిడ్డల కష్టమో దుఃఖమో అర్థం కావడానికి 

నాకూ మీకూ 

భాష కావాల్నా 

వాళ్ళ చూపు చాలదా 

అని గొణిగిందా తల్లి 

********