సునంద భాషితం ;-వురిమళ్ల సునంద, ఖమ్మం

 వరించు...వారించు
  ******
మనిషి  మనసు కోరికల పుట్ట.అంతులేని ఆశలకు ఆలవాలం.
ఎన్నింటినో వరిస్తుంది.ఏవేవో కావాలని ఆశపడుతుంది.కొన్నింటిని చూసి ముచ్చటపడుతుంది.తనకు కావలసినవి ఇతరుల నుండి పొందాలని ఆకాంక్షిస్తుంది. దీనంగా అర్థిస్తుంది.ఇచ్చిన వాటితో తృప్తి పడక కొసరు కావాలంటుంది.ఇలాంటి కోరికల, ఆలోచనల నిలయం మనసు.
ఈపాటికి వరించు పదానికి  ఏమేమి అర్థాలున్నాయో తెలిసిపోయాయి.
కోరు,అపేక్షించు,అభ్యర్థించు,ఆశించు,ఆశపడు,అర్థించు,కోరుకొను,వాంఛించు,చేచాచు,ముచ్చటపడు,కొసరు,ఆకాంక్షించు,కాంక్షించు,అభిలషించు ...మొదలైన అర్థాలే కాకుండా పెండ్లాడు,కట్టుకొను,పరిణయమాడు అనే అర్థాలు కూడా ఉన్నాయి.
ఆశాపాశాలకు లోబడే మనసును అదుపులో పెట్టుకోవాలి.అత్యాశలు,అలవిగాని కోరికలను మనసు దరిదాపుల్లోకి రాకుండా వారించాలి. కోరికలకు కళ్ళెం వేసి అడ్డు కోవాలి.
వ్యక్తిగతంగానే కాకుండా,    బాధ్యతాయుతమైన వ్యక్తులుగా  సమాజంలో జరిగే అవాంఛనీయ ఘటనలను, పోకడలను, సమస్యలను వారించాలి.దురాచారాలు,మూఢ నమ్మకాలను వారించుటలో ముందుండాలి.
ముఖ్యంగా బాల్య దశలో ఉన్న విద్యార్థుల్లో తెలిసి తెలియక పెంచుకున్న అపోహలను వారించాలి.  భవిష్యత్తులో అవే నిజాలనే భ్రమల్లో బ్రతికే ప్రమాదం ఉంది.కాబట్టి అలాంటి వాటిని మొగ్గదశలోనే వారించాలి.
మరి వారించాలి అంటే ఏయే అర్థాలున్నాయో చూద్దాం...ఆటంకపఱచు,అంకిలిపెట్టు,అడ్డగించు,అవరోధించు,అడ్డుకొను,ఆకించు,ఆపు,నిరోధించు,నిలువరించు,మానించు,నివారించు,రోధించు,ప్రతిబంధించు,అరికట్టు,అటకాయించు మొదలైన అర్థాలు ఉన్నాయి.
మంచి అలవాట్లను వరించుదాం.చెడు పోకడలను వారించుదాం.
ప్రభాత కిరణాల నమస్సులతో 🙏