చెట్టునాటు;-- డా.గౌరవరాజు సతీష్ కుమార్.

 చెట్టునాటు బాబూ చెట్టునాటు
అదేకదా మన ప్రగతికి మెట్టు
ఆకులోనొ, పూవులోనొ
కాయలోనొ, కాండంలోనొ
గుట్టుచప్పుడు చేయకుండ
ఆహారాన్ని మనకోసం దాచుతుంది
మలినమైన గాలిని చప్పున లాగేస్తుంది
శుభ్రమైన గాలిని మిక్కుటంగ ఇస్తుంది
వ్యాధులకు మంచి మందు అవుతుంది
ఉండడానికి మనకు గూడు అవుతుంది
మన ఆకలి తీర్చే కూడు అవుతుంది
మన సిగ్గు కాపాడే గుడ్డ అవుతుంది
శుభాలకై పచ్చని తోరణమవుతుంది
దేవుని పాదాల పువ్వు అవుతుంది
పొలాలకోసం హలమవుతుంది
పనులకోసం పరికరమవుతుంది
ఇంట్లోకి చక్కని వస్తువవుతుంది
కాట్లోకి మనను కాల్చే కట్టె అవుతుంది
చెట్టుకోసం మనమంతా
గట్టి పట్టుపట్టాలండీ 
చెట్టుచుట్టె మన బతుకులు ఉన్నాయండీ
చెట్టులేక మనబతుకు చట్టుబండలేనండీ!!
*********************************