నాగుపాము...;- యామిజాల జగదీశ్

 మన దేశంలోని నాగుపాము (ఇండియన్ కోబ్రా) విషపూరితమైనవి. మనదేశంలోనే కాకుండా పాకిస్తాన్,  శ్రీలంక, మయన్మార్, దక్షిణ నేపాల్, బంగ్లాదేశ్, భూటాన్, తూర్పు ఆఫ్ఘనిస్తాన్ తదితర ప్రాంతాలలో నాగుపాముల సంతతిని చూడొచ్చు.
దట్టమైన అడవులలో ఇవి ఎక్కువగా నివసిస్తాయి. అలాగే నీటి మడుగుల సమీపంలో ఇవి కనిపించే అవకాశాలు ఎక్కువ.
పంట పొలాలలో కూడా ఇవి అడపాదడపా కనిపిస్తుంటాయి. సముద్ర మట్టం నుంచి ఆరువేల ఆరు వందల అడుగుల ఎత్తున్న ప్రాంతాలలోనూ ఇవి నివసించగలవు. 
ఇవి ఎక్కువగా తొర్రలు, పొదలను తమ స్థావరాలుగా చేసుకుంటాయి.
నగరాజుగా పిలిచే నాగుపాములు బలంగా కనిపిస్తాయి. ఇవి మూడు నుంచి అయిదు అడుగుల వరకూ పొడవుంటాయి. అయితే కొన్ని నాగుపాములు ఏడు అడుగులపైనే ఉంటాయి. ఇవి ఎక్కువగా శ్రీలంకలో కనిపిస్తాయి.
నాగుపాములు ఏప్రిల్ - జూలై నెలల మధ్య గుడ్లు పెదతాయి. ఆడ పాములు పన్నెండు  నుండి ముప్పై వరకూ బొరియలలో గుడ్లు పెడతాయి. ఇవి దాదాపు ఎనిమిది మొదలుకుని పది వారాల వరకూ గుడ్లను పొదుగుతాయి.  
అప్పుడే పుట్టిన పాములలోసైతం విషపు గ్రంథులు ఉండటం గమనార్హం.
పుట్టేటప్పుడు వీటి పొడవు ఇరవై నుంచి ముప్పై సెంటీమీటర్ల వరకూ  ఉంటుంది.
నాగుపాము పడగ విప్పి నాదస్వరానికి అనుగుణంగా ఆడటం చూడవలసిన దృశ్యమే. 
నాగుపాములకు వినికిడి శక్తి లేదు. కానీ నాదస్వరం కదలికలు, భూమిలో వచ్చే ప్రకంపనలను గ్రహించి అవి అటూ ఇటూ కదులుతాయి.
పరమేశ్వరుడు ధరించే పాము పేరు వాసుకి. ఇక విష్ణువు శయనించేది ఆదిశేషుడిపైనే.
పాములలోనే కింగ్ కోబ్రా అనే పాము జాతికి చెందినవి కూడా ఉంటాయి. వీటిని కోబ్రా అని అన్నప్పటికీ నిజానికివి కోబ్రా జాతికి చెందవు. ఇవి విషపూరితమైనవి. ప్రమాదకరమైనవి. 
బాగా ఎదిగిన కింగ్ కోబ్రా పొడవు ఎనిమిది నుంచి పద్దెనిమిది అడుగుల వరకూ ఉంటాయి. వీటి ఆయువు ఇరవై అయిదేళ్ళు. 
ఆడ పాములకంటే మగవి పొడవెక్కువ. బరువులోనూ మగ పాములదే పైచేయి. బరువెక్కువ ఉన్నప్పటికీ ఇవి చురుగ్గా వేగంగా కదులుతాయి. 
మయన్మార్, కంబోడియా, లావోస్, థాయిలాండ్, వియతానం, మలేసియా, ఫిలిప్పీన్స్, ఇండోనేషియా ప్రాంతాలలో కింగ్ కోబ్రాలు ఎక్కువ. ఇవి మిగిలిన పాములను ఇట్టే లాగించేస్తాయి. అందుకే వీటిని కింగ్ కోబ్రా అనే పేరు వచ్చినట్టు చెప్తారు. 
దీని తల భాగం పెద్దగా ఉంటుంది. కింగ్ కోబ్రా ఓసారి కాటేసిందంటే కనీసం అయిదు వందల మిల్లీగ్రాముల మేరకు విషం చిమ్ముతుంది.
-