సునంద భాషితం ;-వురిమళ్ల సునంద, ఖమ్మం

 విశయము... విషయము 
 ******
విశయము మనసును తొలుస్తుంటే వివేకము పదే పదే  ఆలోచిస్తుంది. మబ్బు తెర లాంటి విశయము వీడితే గానీ  మనసు కుదుట పడదు.
విశయములను ఎప్పటి కప్పుడు తీర్చుకోవడం జ్ఞానవంతుల  లక్షణము.
అసలు విశయము అంటే ఏమిటో చూద్దాం... సందేహము, అనుమానము,అరగలి,అరమర,శంక, సందిగ్ధము,వితర్కము,సందియము,సంశీతి,సంసయము,వికల్పము లాంటి అర్థాలతో పాటు నివాస స్థానము అనే అర్థం కూడా ఉంది.
విశయము గురించిన వివిధ అర్థాల విషయము తెలిసింది కదా!మనకు.
మనం  ఉండే విషయాన్ని ప్రేమించాలి.ఈ విషయముపై జన్మించడమే మన అదృష్టంగా భావించాలి.దేశభక్తిని కలిగి వుండాలి. దేశభక్తులకు సంబంధించిన జీవిత చరిత్ర గ్రంథములను బాగా చదివి, అందులోని విషయమును ఆకలింపు చేసుకోవాలి.
విషయము గురించిన విశయము వీడింది కదా ఇప్పుడు విషయము అంటే ఏమిటో చూద్దాం... సంగతి,ఇంద్రియార్థము, లౌకికార్థము,పాయకట్టు, గోచరము,గ్రంథాదులందు ఉండు సారాంశముతో పాటుగా శరణము, దేశము, నిమిత్తము, వస్తువు,రేతస్సు, రాజ్యము, పెద్ద పట్టణమునకు సమీపంలో ఉన్న ఉప గ్రామముల సమూహము,రాష్ట్రము, పుడమి, భూమి, ముంజ గడ్డి, మండలము లాంటి అర్థాలు ఉన్నాయి.
మనకు కలిగే విశయములను వెంటనే నివృత్తి చేసుకోవాలి.విషయమును ఆమూలాగ్రం అవగాహన చేసుకోవాలి.
ప్రభాత కిరణాల నమస్సులతో 🙏