'భిన్నమైన' సంసారం!(కవిత );-కొత్తపల్లి ఉదయబాబు-సికింద్రాబాద్.

నేనొక్కడిగా ఉన్నప్పుడు నా

బ్రతుకు ఒక  సరి ప్రధాన  సంఖ్య!

తాను సున్నలా వచ్చి చేరినప్పుడు

'పది'లాంటి పరిపూర్ణ సంఖ్యయే!

ఏడాది మా సంసారం క్రమ భిన్నమే

నేను లవంలో ఉన్నా తనదే ఆధిక్యత.

నేను ' హారమై'న అపక్రమ భిన్నం లోను

కానీ నాకు కొండంత   చేయూత!

ఇద్దరు ముగ్గురమైన 'సంయుక్త సంఖ్య'లో

'పూర్ణాంకమై' నిలబడిన పిల్లలు ఉన్న క్షణాన

గుణకార, కూడికల మిశ్రమభిన్నమే -కానీ 

తన ఆధిక్యతతో మళ్లీ మాది 'క్రమభిన్నమే'.

ఆలుమగల అన్యోన్య సంసారంలో

ఎవరు కింద ఎవరు పైనున్నా

మిశ్రమ భిన్నాలు - అపక్రమ భిన్నాలై

తన సహకారంతో మలిగినప్పుడే,

సంసారపు విలువ తెలిసేది

అనురాగ దాంపత్యానికి

ఆలవాలమై నిలిచేది!

అనురాగసంగమ జ్యోతిగా వెలిగేది!

సమాప్తం