"ఇస్తే మనమూ దేవుడే!;-- యామిజాల జగదీశ్

 అమ్మా అయ్యా ధర్మం చేయండంటూ చెయ్యి చాచి అడుక్కునే వారితో "చేతులూ కాళ్ళూ బాగానే ఉన్నాయిగా...ఏదన్నా పని చేసుకుని బతుకొచ్చుగా. ఇలా అడుక్కో వడమేమిటీ?" అని చీదరించుకుంటాం. 
అయితే అలా చీదరించుకునే మనమే ఆలయానికి వెళ్ళి దేవుడి హుండీలో పదో ఇరవయ్యో యాభయ్యో వేసి "నాకు డబ్బివ్వు....ఇల్లివ్వు...అమ్మాయికి పెళ్ళయ్యేలా చూడు...పిల్లాడ్ని చదివించు...
అని రకరకాల కోరికలు కోరుతాం..." ఇవన్నీకూడా ఓ విధంగా చెప్పాలంటే అడుక్కోవడమే అవుతాయి.
మన దగ్గరకొచ్చి అడుక్కునేవారిని మనం ఏదన్నా పని చేసుకుని బతుకు ఈ ఆడుక్కోవడమేమిటీ అని మనం చెప్పినట్టే మనం ఆలయంలో కోరికలు కోరినప్పుడు ఆ దేవుడు కూడా మనతో చెప్తే ఏమవుతుంది? నీకు కాళ్ళూ చేతులూ ఉన్నాయిగా. కష్టించు. డబ్బులు సంపాదించుకో" అని చెప్తే దేవుడ్ని ఏమనగలం?!
లేనివారు లేదంటూ అడిగేటప్పుడు ఉన్నవారు ఇస్తే అతనూ లేనివారికి ఓ విధంగా దేవుడే అవుతాడు.
దేవుడ్ని ఎక్కడో వెతకకు. 
మనలోనే మంచి ఆలోచనతో మంచి మాటతో కరుణతో సాయంతో దేవుడ్ని సృష్టించుకోవచ్చు.