సునంద భాషితం ;-వురిమళ్ల సునంద, ఖమ్మం

 అప్యయము... ఆప్యాయము
*******
ఆదిమత్వము నుండి ఆధునికత వైపు అడుగులు వేసిన మానవులం.శాస్త్ర సాంకేతిక పరిజ్ఞానాన్ని పెంచుకుని అధునాతన సౌకర్యాలను అనుభవిస్తున్నాం.
ఎంతో మేథస్సుతో ప్రకృతిలోని గుట్టు మట్లను తెలుసుకుని ఇంతగా అభివృద్ధి చెందిన  మన జాతి ప్రకృతిని అప్యయం చేయడం చాలా బాధాకరం.
చెరువులను,తరువులను  కొండలు గుట్టలను ,నదీనదాలను, ఒకటేమిటి ఎన్నింటినో అప్యయం చేయడం వల్ల కాలుష్యంతో పాటు  కరోనా లాంటి వ్యాధుల బారిన పడి విలవిల లాడుతున్నాం.
ఇకనైనా  అప్యయం చేయడం లాంటి దుశ్చర్యలు మానేయాలి.
అప్యయము అంటే ఏమిటో చూద్దాం... అప్యయము అంటే నాశనము, అంతము, క్షయము, వినాశనము, ధ్వంసము,నిర్మూలనము, లయము, వమ్ము , సంహారము లాంటి అర్థాలు ఉన్నాయి.

ఆప్యాయము లేనంత కాలం మానవుడి ఆశ అత్యాశకు దారి తీస్తుంది.ఆ అత్యాశే అప్యయమునకు పూనుకుంటుంది.
 ఆప్యాయము ఉన్న చోట ఆనందం నీడలా వెంట ఉంటుంది.ఆప్యాయమును మించిన గొప్ప ఆస్తి మరొకటి లేదు.
ఆప్యాయము అంటే ఏమిటో చూద్దాం... తృప్తి, తనివి, ప్రసన్నము సౌఖ్యము సౌమనస్యము,సంతసము, సంతృప్తి అనే అర్థాలతో పాటు ప్రేమ,ఇంపు,ఎలమి, గారాబము అనే అర్థాలు కూడా ఉన్నాయి.
అప్యయము చేసే గుణాలను వదిలి వేయాలి. ఆప్యాయము అనే లక్షణాలను పెంచుకోవాలి.
శుభ సాయంత్ర నమస్సులతో🙏