కన్నీటి కథనం;-డా.నీలం స్వాతి,చిన్న చెరుకూరు గ్రామం,నెల్లూరు.6302811961.

 మొగ్గలు రేపటి కాంతులు,
పువ్వులు నేటి వారసులు,
పచ్చదనం గమ్యాలకు చేరువచేసే ఇంధనం...
ఎండిన ఆకుల సాఫల్యం
తల పండిన అనుభవం...
తరాల బాటలో పయనించి కుటుంబం అన్న కొమ్మకు పునాదులు వేసాను...
అనుబంధాల, అనురాగాల
ఆనంద డోలికలలో ఊయల లూగి కలల సౌధాన్ని ఏనాడో కనుగొన్నాను...
రెప్పపాటు గాలి చాలు
ఉసురు తీసేయడానికి....
చిట్టి చినుకైనా చాలు
బ్రతుకును చిదిపెయ్యడానికి...
పచ్చని జీవితం ఊహాభరితమే అని తెలుసు
అయినా వాస్తవాన్ని అంగీకరించడం 
కాని పని...
క్షీణిస్తున్న ఆరోగ్యం 
సంతోషాలను దూరం చేస్తుంది...
సహకరించని శరీరం ఆత్మవిశ్వాసాన్ని దెబ్బతీస్తుంది...
ఒంటరితనం శూన్యంలా భ్రమింప జేస్తుంది... 
సతమతమవుతున్న 
మనసు రేపటి హెచ్చరికలను జారీ చేస్తుంది...
ఆలోచనల ఆందోళనల 
మధ్య 
చీకటి కరిగిపోతుంది...
అయినా తపన, 
వానలో చిందులేస్తున్న చిన్నపిల్లల్లా తీరడం లేదు...
కానీ
కాలం మాత్రం పూచే పూల, రాలే ఆకుల
లెక్కలు సరిచేసేస్తుంది.... ఎప్పటిలానే....
ఓ దృవతార నింగికి ఎగిసిపోతుంది... ఓ ఎండుటాకు నేలకు రాలిపోతుంది...!