సునంద భాషితం ;-వురిమళ్ల సునంద, ఖమ్మం

 న్యాయాలు -4
అచలచల న్యాయము
   *****
నాలుగు రోజుల నుంచి మనం వివిధ సంస్కృత న్యాయాల గురించి చర్చిస్తూ, తెలుసుకుంటున్నాం.
న్యాయము అంటే శాస్త్ర ప్రకారం ఏది తప్పు, ఏది ఒప్పు అని, వాటిలోని నిజా నిజాలను నిర్థారించి చెప్పేది.
అయితే తార్కిక, ఆధ్యాత్మిక దృష్టితో కొందరు పండితులు, కావ్య రచన చేసేవారు కొన్ని న్యాయాలను గురించి మరో కోణంలో చెప్పారు. అవే సాహిత్య పరంగా సంస్కృత, తెలుగు న్యాయాలుగా రూపుదిద్దుకుని నిత్య జీవితంలో సందర్భానుసారంగా ఉపయోగించబడుతున్నాయి.ఇవన్నీ మానవుల అనుభవాలు, నిశిత పరిశీలనల నుండి ఉద్భవించినవే.
వీటిని నాదైన శైలిలో వివరించడానికి చేస్తున్న ప్రయత్నమే ఇది.
*****
ఈరోజు చర్చించే న్యాయము "అచలచల న్యాయము". 
 అచలము అనగా చలించని,కదలని అని అర్థం. మరి చల అంటే కదలడం అని అర్థం.
కదలనిది  కదిలినట్లు అనిపించడమే అచలచల న్యాయము.
కదలనిది కదలడమేమిటి అనే సందేహం కలుగుతుంది.
ఉదాహరణకు మనం ఓ ఓడలోనో, విమానంలోనో ప్రయాణం చేస్తూ ఉంటాం. అలా ప్రయాణంలో మనమేమో కదలకుండా ఉన్నట్లు,మన  చుట్టూ ఉన్న చెట్టూ చేమా మొదలగునవేమో కదులుతున్నట్లు కనిపిస్తూ ఉంటాయి. దీనినే అచల చల న్యాయము అంటారు.
మరో ఉదాహరణగా మన మనసును గురించి చెప్పుకోవచ్చు. మనిషి కదలకుండా అచలముగా ఓ చోట కూర్చుని ఉన్నా మనసు మాత్రం ఎక్కడెక్కడికో పరిభ్రమిస్తూ/ కదిలిపోతూ/చలిస్తూ వుంటుంది.
ఈ విధంగా మనం చేసే ప్రయాణంలో మనమేమో కదలకుండా ఉన్నట్లు,మన చుట్టూ ఉన్నవేమో కదులుతున్నట్లు అనిపించడాన్ని అచల చల న్యాయం అంటాం.
ప్రభాత కిరణాల నమస్సులతో🙏