సునంద భాషితం ;-వురిమళ్ల సునంద, ఖమ్మం

 న్యాయాలు -24
ఏక నాళ ఫల బాహుళ్య న్యాయము
******
ఏక అంటే ఒక అని అర్థం.నాళము అంటే కాడ అని అర్థం.ఫల అంటే పండ్లు.బాహుళ్య అంటే అధికము అని అర్థం.
ఒకే కాడను  ఆధారముగా చేసుకొని అనేక ఫలములు వ్రేలాడటాన్ని  ఏక నాళ ఫల బాహుళ్య న్యాయము అంటారు.
 కొన్ని కుటుంబాల్లో ఇంటిల్లిపాదీ  ఏ పనీ పాటా లేకుండా ఆ ఇంటి యజమాని మీదనే మొత్తంగా ఆధారపడుతూ ఉంటారు.
వారు తిండికి బట్టకు ఇబ్బంది పడకుండా వారి అవసరాలకు  కావాల్సిన డబ్బు సంపాదించేందుకు ఆ కుటుంబ యజమాని  రెక్కలు ముక్కలు చేసుకుంటూ అహర్నిశలు శ్రమిస్తుంటాడు.ఆ వ్యక్తికి ఏమైనా జరిగితే ఇక వాళ్ళ జీవితాలు అస్తవ్యస్తమే.
అలా పండ్లను మోసే కాడకు చీడ పట్టినా, ఏదైనా దెబ్బ తాకినా ,దానికి వేలాడే పండ్లన్నీ ఆధారం కోల్పోయి చెల్లాచెదురై రాలిపోతాయి కదా!.
ఇంటి మొత్తాన్ని పోషించే వ్యక్తి  సమర్థత, సంపాదన మీదనే కుటుంబ స్థితి గతులు ఆధారపడి ఉంటాయనీ, అలా ఒక కాడను ఆధారంగా చేసుకుని  అనేక ఫలాలు వేలాడినట్లు  ఉండే కుటుంబాలను చూసే ఇలాంటి ఏక నాళ ఫల బాహుళ్య న్యాయము వాడుకలోకి వచ్చింది. 
 
ఇలాంటి న్యాయాలన్నీ మన వెనుకటి తరాల నిశిత పరిశీలనకు మచ్చుతునకలు.
ప్రభాత కిరణాల నమస్సులతో 🙏