సంస్కృత న్యాయాలు.;-తాటి కోల పద్మావతి

 1. అహిన కుల న్యాయం-పాము ముంగిసలువలే, స్వభావ వైరం కలవాలని గురించి చెప్పేటప్పుడు ఉపయోగిస్తారు.
2. కూప స్థ మండూక న్యాయం-బావిలోని కప్ప, ఆ బావే సమస్త ప్రపంచం అనుకుంటుంది. అదేవిధంగా ప్రపంచ జ్ఞానం లేని వాళ్ళు తమకు తెలిసిందే విజ్ఞానమని భావిస్తారు.
3. గత జల సేతు బంధన న్యాయం-నీళ్లు పోయిన తరువాత గట్టు వేస్తే ప్రయోజనం ఉండదు. తగిన సమయంలో కార్యాలు చేయాలి. లేకపోతే వ్యర్ధమవుతుంది.
4. భ్రమర కీటక న్యాయం-తుమ్మెద వెంట తిరుగుతూ ఒక పురుగు, నేను తుమ్మెద నవుతా ననే భావనతో అదే శబ్దాన్ని అనుకరిస్తూ తుమ్మెద వెంట తిరిగి తిరిగి, చివరకు తుమ్మెద గానే మారుతుంది. భావన బలాన్ని సూచించే న్యాయం.
5. మర్కట కిశోర న్యాయం-తల్లి కోతి ఒక చెట్టు పై నుండి మరో చెట్టు పైకి దూకుతుంటే, పిల్లలు దాన్ని గట్టిగా పట్టుకుంటాయి. అది వాటి స్వభావం. ఇది స్వప్రయత్నం మీద ఆధారపడి ఉంటుందనే విషయాన్ని సూచిస్తుంది. దీన్ని వేదాంతంలో జ్ఞానమార్గానికి ఉదాహరణగా చెప్పారు.