ఆ మూడూ మరవకు;-- యామిజాల జగదీశ్

ఓ మంచి మనసున్న ఆ తండ్రి తన కొడుకుతో ఇలా చెప్పాడు...
"ఒరేయ్ పుత్రా! నీ జీవితంలో మూడు నేను చెప్పే ఈ విషయాలూ మరచిపోకు. ఎట్టి పరిస్థితిలోనూ వీటిని విడవకు..." అని.
అవి, 
మంచి ఆహారాన్ని తినడం! 
మంచి చోట పడుకోవడం! 
గొప్ప ఇంట్లో జీవించడం!
ఈ మాటలన్నీ విన్న కుమారుడు అడిగాడు...
"మనం పేదవాళ్ళం. నేనెలా మీరు చెప్పినవి పాటించగలను?" అని.
అప్పుడా తండ్రి ఇలా చెప్పాడు...
ఆకలి వేసినప్పుడు మాత్రమే తింటే చాలు. అప్పుడు ఏదైతే తింటున్నావో అదే శ్రేష్టమైన ఆహారం!
ఒళ్ళు వంచి శ్రమించాలి. అలసటతో నిద్రపోవాలి. ఆ పడుకున్న చోటే మెత్తటి పరుపు! నిద్ర సుఖమెరుగదు!
ప్రజలతో ప్రేమతో మెలగాలి. వారి హృదయాలలో స్థానం సంపాదించాలి. అప్పుడదే నువ్వు ఉంటున్న గొప్ప ఇల్లు!