శ్రీ విష్ణు సహస్రనామాలు (బాల పంచపది )- ఎం. వి. ఉమాదేవి

31)సంభవః -

తనకుతానైన అవతారము

లేదికను కర్మ కారణము 

లేనట్టిది ఎట్టి బంధనము

కోరుకున్నచోనిచ్చు దర్శనము 

శ్రీ విష్ణు సహస్రనామాలు ఉమా!

32)భావనః -

కామితార్థముల ప్రసాదనము 

తొలిగించునులే మాలిన్యము 

భక్తులకిచ్చునుగా అభయము

ప్రసాదించునూ పునర్జన్మము 

శ్రీ విష్ణు సహస్రనామాలు!ఉమా!

33)భర్తాః -

అందరినీ భరించెడి వాడు

యోగక్షేమముల కారకుండు

సకలలోక పరమార్థకుడు

పతి, గతి తానైనట్టి వాడు

శ్రీ విష్ణు సహస్ర నామాలు ఉమా!

34)ప్రభవః -

దివ్యమైన జన్మగలవాడు

స్వచ్ఛoధ అవతారకుండు 

కర్మలకు లోబడని వాడు

యోగియై ప్రభవించువాడు 

శ్రీ విష్ణు సహస్ర నామాలు ఉమా!

35)ప్రభుః -

సర్వాధిపతిగానున్నవాడు

శక్తిమంతుడై రాజిల్లువాడు

బ్రహ్మాదులకు భోగమొసగువాడు

సర్వులకునూ మోక్షమిచ్చువాడు

శ్రీ విష్ణు సహస్రనామాలు ఉమా!