కర్పూర నీరాజనం !- గుర్రాల లక్ష్మారెడ్డి కల్వకుర్తి.-సెల్ .9491387977.-నాగర్ కర్నూల్ జిల్లా.

అదిగో అల్లదిగో చూడు

ఇదిగో మళ్లి ఇదిగో నేడు

వచ్చెను నవంబర్ ఫస్టు

తెచ్చెను సంబరాల బెస్టు !

ముక్తకంఠంతో జై కొట్టి

భక్తి భావంతో ప్రతిన బట్టి

సైయంటూ  పతాకాలను

పై మింటికి  ఎగురవేయి !

అమరజీవి శ్రీరాములు పొట్టి

అమలాశయాన్ని తాను చేపట్టి

ఆంధ్ర రాష్ట్ర అవతరణకు గట్టి

అంకురార్పణ చేసే ప్రతినబట్టి !

ఆరిపోని దీపాన్ని వెలిగించి

మారిపోని రూపాన్ని మిగిలించి

మామ విడిచి వెళ్ళావా మహాత్మా

మిము మరిచి ఉండదు మా ఆత్మ!

మా మెదడు దడి క్రింద దాక్కున్న

నీ జ్ఞాపకాల భావ చిత్ర పరిమళాలు

కిమ్మిర కిర్మీర నవపుష్పాలై నేడు కిలకిల నవ్వుతూ ఉన్నాయి

 చూడు. !

అందరి మా అందరి జాతకాల మార్చి

సుందర నందన చంద్రిక తీరాలకు చేర్చి

నందన నవ చందన హాలాలను కూర్చి

అలంకరించావు ఆంధ్ర లక్ష్మి గళమందు పేర్చి !

తెలుగు ఆంధ్రము కలిసినాయి

వెలుగు వానలు కురిసినాయి

ఆంధ్రజనుల డెంధముల యందు

ఆంధ్ర లక్ష్మి వేసింది అందాల చిందు !

ఆమరణ నిరాహార దీక్షను చేపట్టి

అమరజీవి అయినా ఆ జగజ్జెట్టీకి

అర్పిస్తున్నాం అక్షర తర్పణ తోరణం

సమర్పిస్తున్నాం సవాలక్ష కర్పూర నీరాజనం !