చిత్ర స్పందన : -ఉండ్రాళ్ళ రాజేశం

 *సీసం*

పొలమున నాగలి పుడమిని పెకలించి
దున్నిన సాలున దుక్కిచదను
మడినందు నీటిన తడితోని మట్టియు
దారులు విడిచిన తాండవించు
బురదమయున రైతు బుద్దితో యెద్దుల
మడిన తింపే నేర్పు మనసుదోచు
గొర్రుతో సర్థుతూ జర్రున జారుతూ
పడుతు లేచి పరుగు పగ్గమట్ట


*తేటగీతి*

ఒడ్డు వొరము గలుమలకు వొండ్రుపెట్టి
నారు కావడందున పంచు నాటువేయ
గోకలందున తిరుగుతు గుంటుకేసి
పొద్దుగూకు వరకు రైతు పొలమునుండు

*కందం*
నాటును వేయగ పడతుల్
జంటగ వెనకాల నడచి సన్నని నారున్
మేటిగ విప్పుతు నాటుతు
సూటిగ సాగినను వొడ్డు చురుకున చేరేన్