నేటి చిన్నతప్పు..! రేపటి ఆరని నిప్పు..!:- కవిరత్న సాహిత్యధీర సహస్రకవి భూషణ్ పోలయ్య కూకట్లపల్లి అత్తాపూర్...హైదరాబాద్

ఓ అమ్మాయిల్లారా.!

ఓ అబ్బాయిల్లారా..!

ఓ అమాయక ప్రేమికుల్లారా…

పిచ్చిప్రేమను పూలమాలగా ధరించి

పార్కుల్లో విహరించే ఓ ప్రేమపక్షుల్లారా..!

జతగా మారే జంటలకు

స్వేచ్ఛ ఒక వరం కావొచ్చు…

ఒక ప్రేమ పల్లకీ కావచ్చు…కాని అది

కలకాలం...మాయనిమచ్చ కారాదు..!

పకపక నవ్వులతో పచ్చనిపొదల మధ్య

ప్రేమగా తిరగడంలో తప్పేమీ లేదు…

కాని…సాయంత్రపు చిమ్మ చీకటిలో

సిగ్గులజ్జాలేని ఆ ముద్దు ముచ్చట్లే...

మైకంలో ఏదో మత్తులో మునిగిపోయి

చేసే ఆ చిన్న తప్పు రేపు ఆరని నిప్పు..!

ఆ తప్పు అందరిలో

పెళ్లిపందిరిలో మెడలో తాళైతే మేలే...

కాని...కోరికలు తీరగానే…

తీరం దాటి తెప్పను తగలేస్తే...

ఖర్మ కాలి కాలుజారి కడుపు పండితే...

తల్లిదండ్రుల కెన్ని తలవంపులు...?

అందుకే…

పార్కుల్లో స్వేచ్ఛగా తిరిగే

ఓ అమాయక అమ్మాయిల్లారా..!

ఓ ప్రేమపక్షుల్లారా..!

గులాబీలు పట్టుకున్న గుంటనక్కలు…

మీ చుట్టూ తిరుగుతూనే ఉంటాయి..!

ఇకనైనా ఈ కంప్యూటర్ యుగంలోనైనా

కళ్ళుతెరిచి ఈ రంగులలోకాన్ని చూడండి!

ఒళ్ళు దగ్గర పెట్టుకోండి..!

సెల్లు దూరం పెట్టుకోండి ..!

కల్తీ ప్రేమకు చెక్ పెట్టండి..!

స్వచ్ఛమైన ప్రేమకు హారతి పట్టండి..!