‘ఐదు రూపాయల వైద్యుడు’ : -- యామిజాల జగదీశ్

అవును, ఆయన అయిదు రూపాయల డాక్టరుగా ప్రసిద్ధి.
సేవ, కరుణ, మానవత్వానికి ఆయన సజీవ చిహ్నం.
కర్ణాటకలోని మాండ్య జిల్లాకు చెందిన డాక్టర్ శంకర్ గౌడను తరతరాలుగా “5 రూపాయల వైద్యుడు” అని  ప్రేమగా చెప్పుకుంటారు. ఆయన చర్మవ్యాధి నిపుణుడు. ఆయన తన జీవితంలో 4నాలుగు దశాబ్దాలకుపైగా నిస్వార్థ వైద్య సేవకు అంకితమయ్యారు. నేటికీ, ఆయన 5 రూపాయలు మాత్రమే "కన్సల్టేషన్ ఫీ"గా వసూలు చేయడం గమనార్హం. ఆయన ఈ ప్రయాణం అసాధారణం.
1982లో ఆయన తన ప్రాక్టీస్ ప్రారంభించినప్పుడు ఆయన నిర్ణయించిన మొత్తం అదే.
వైద్య చికిత్స తరచుగా భరించలేనిదిగా, వ్యాపారంలా మారిపోయిన ఈ రోజుల్లో, డాక్టర్ గౌడ వినయం, కరుణకు అరుదైన ఉదాహరణగా నిలిచారు. 
ప్రతిరోజూ, వందలాది మంది రోగులు ఆయన క్లినిక్కుకి వెళ్తారు. ఉన్నవారు లేనివారు అనే వివక్ష లేకుండా ఒకే రకమైన శ్రద్ధ, అంకితభావంతో ఆయన చికిత్స చేస్తారు. అదే ఆయన ప్రత్యేకం.
ఆయన నమ్మకం స్పష్టంగా అచంచలమైనది. వైద్యం వ్యాపారం కాదు, మానవాళికి సేవ అనుకుంటారాయన.
ఆయనకు, వైద్యం అనేది ప్రాథమిక మానవ హక్కు. ధనవంతులకు మాత్రమే కేటాయించినది కాదు. డబ్బు ఎప్పుడూ ఆయన ప్రేరణ కాదు. ప్రజల నమ్మకం, ఆశీర్వాదాలు, కృతజ్ఞత ఎల్లప్పుడూ ఆయనకు నిజమైన బహుమతి. 
అతి నిరాడంబరంగా ఉంటూ కీర్తి ఖ్యాతులు ఆశించక జీవితాన్ని గడుపుతూ, డాక్టర్ గౌడ లాభం కంటే లక్ష్యాన్ని ఎంచుకున్నారు.
ఆయన కథ కేవలం వైద్యుడి గురించి కాదు, మానవత్వానికి స్వచ్ఛమైన రూపం గురించి. నిజమైన గొప్పతనం ఇతరులకు నిజాయితీతో సేవ చేయడంలో ఉందని మనకు గుర్తు చేస్తుంది ఆయన వ్యవహారశైలి. ఆయన ఎంచుకున్న మార్గం.