బెంజమిన్ ఫ్రాంక్లిన్ సోదరి: - - యామిజాల జగదీశ్

 బెంజమిన్ ఫ్రాంక్లిన్ సోదరి అతనికి 63 సంవత్సరాల పాటు ఉత్తరాలు రాసింది. అతను ప్రసిద్ధి చెందాడు. ఆమె పేదరికంలో పన్నెండు మంది పిల్లలను పెంచింది. వారిలో ఒక్కరు మాత్రమే ఆమె కంటే ఎక్కువ కాలం జీవించారు. అటువంటి ఆమె పేరును చరిత్ర మరచిపోయింది.
ఆమె పేరు జేన్ ఫ్రాంక్లిన్ మెకామ్.
ఆమె మార్చి 27, 1712న బోస్టన్‌లో జన్మించింది. పదిహేడు మంది పిల్లలలో చిన్నది. ఆమె తల్లి అబియా ఫోల్జర్ కన్న చివరి సంతానం.
ఆమె సోదరుడు బెంజమిన్ ఆమె కంటే ఆరు సంవత్సరాలు పెద్దవాడు. 1706లో జన్మించాడు. అతను పదవ కుమారుడు.
వారు ఒకరినొకరు బెన్నీ, జెన్నీ అని పిలుచుకునేవారు.
ఆమె అతన్ని తన "రెండవ రూపం"గా భావించేది.
జేన్ ఎప్పుడూ పాఠశాలకు వెళ్ళలేదు. బోస్టన్‌లోని ప్రభుత్వ పాఠశాలల్లో బాలికలను చేర్చుకునేవారు కాదు.
దానికి బదులుగా, బెంజమిన్ ఆమెకు చదవడం, రాయడం నేర్పించాడు.
ప్రతిరోజూ, తన తెలివైన అన్నయ్య నుండి ఎంతో ఓపికతో పాఠాలు నేర్చుకుంది.
బెంజమిన్ పారిపోయినప్పుడు ఆమె వయస్సు పదకొండు సంవత్సరాలు.
బెంజమిన్, తన అన్నయ్య జేమ్స్ వద్ద శిక్షణ నుండి తప్పించుకోవడానికి బోస్టన్ నుండి పారిపోయాడు. జేమ్స్ ఒక ప్రింటర్. అతను బెంజమిన్‌ను చాలా దారుణంగా చూసుకునేవాడు.
అతను ఫిలడెల్ఫియాకు వెళ్ళాడు... తన దారి తాను చూసుకోవడానికి.  ఒక స్థాయికి ఎదగడానికి.
జేన్ బోస్టన్‌లోనే ఉండిపోయింది. ఆమె వయసు పదకొండు సంవత్సరాలు. ఆమె ఉపాధ్యాయురాలు వెళ్లిపోయింది.
నాలుగేళ్ల తర్వాత, 1727 జూలై 27న, జేన్ ఎడ్వర్డ్ మెకామ్‌ను వివాహం చేసుకుంది.
ఆమె వయసు పదిహేను సంవత్సరాలు. మసాచుసెట్స్‌లో చట్టబద్ధమైన వివాహ వయస్సు పదహారు, కానీ కొన్ని మినహాయింపులు ఉండేవి.
ఎడ్వర్డ్ వయసు ఇరవై రెండు సంవత్సరాలు. జీనులను, పగ్గాలను తయారుచేసే ఒక జీను తయారీ దారుడు. పేదవాడు. అక్షర జ్ఞానం చాలా తక్కువ. స్కాట్లాం డ్ నుండి వలస వచ్చిన వాడు.
చరిత్రకారుల అభిప్రాయం ప్రకారం, అది ప్రేమ వివాహం కాదు. జేన్ తల్లిదండ్రులు దీనిని ఆమోదించలేదు. ఆమెకు వారి కుటుంబ మతగురువు కాకుండా, వేరే చర్చి పాస్టర్ ద్వారా వివాహం జరిగింది.
కొంతమంది చరిత్రకారుల అంచనా ప్రకారం, జేన్ గర్భవతి అయి ఉండవచ్చు, కుటుంబపరువును కాపాడటానికి ఈ వివాహం కుదిర్చారు. ఒకవేళ అదే నిజమైతే, ఆమెకు గర్భస్రావం జరిగింది. ఆమె మొదటి బిడ్డ, జోషియా, రెండు సంవత్సరాల తర్వాత గానీ జన్మించలేదు.
ఖచ్చితంగా తెలిసిన విషయం ఏమిటంటే : ఎడ్వర్డ్ మెకామ్‌తో జేన్ జీవితం కష్టాలతో కూడుకున్నదే.
ఇరవై ఒక్క సంవత్సరాల కాలంలో, ఆమె ఏకంగా పన్నెండు మంది పిల్లలను కన్నది : జోషియా, ఎడ్వర్డ్, బెంజమిన్, ఎబినెజర్, సారా, పీటర్, జాన్, మరో జోషియా, జేన్, జేమ్స్, మేరీ, అబియా.
వారిలో ముగ్గురు తమ మొదటి పుట్టినరోజుకు ముందే మరణించారు.
ఇద్దరు కుమారులు తమ తండ్రి మానసిక అస్థిరతను వారసత్వంగా పొంది, మానసిక వైద్యశాలలలో కొంతకాలం గడిపారు.
ఆమె ప్రసిద్ధ సోదరుడి పేరు మీద పెట్టిన బెంజమిన్ అనే ఒక కుమారుడు, ట్రెంటన్ యుద్ధం సమయంలో అదృశ్యమయ్యాడు.
ఎడ్వర్డ్ మానసిక అనారోగ్యం, అప్పులతో సతమతమయ్యాడు.  అతను జైలులో చాలా కాలం గడిపాడు. దాంతో కుటుంబాన్ని పోషించే బాధ్యత జేన్‌పై పడింది.
కొవ్వొత్తులు, సబ్బులు తయారుచేసే తన తండ్రి జోసియా నుండి ఆమె సబ్బులు తయారుచేయడం నేర్చు కుంది.
ఆమె తన ఇంట్లో బస చేసే వారిని చేర్చుకుంది.
ఆమె కుట్టుపని చేసేది. అతికష్టంగా బ్రతికింది.
1765లో, ముప్పై ఎనిమిది సంవత్సరాల వివాహం తర్వాత, ఎడ్వర్డ్ మరణించాడు. అతను వీలునామా రాయలేదు. జేన్‌ను అప్పుల్లో ముంచివేశాడు.
అప్పుడు ఆమె వయసు యాభై మూడు సంవత్సరాలు. సహాయం అవసరమైన పిల్లలు, మనవళ్లు బతికే ఉన్న ఒక వితంతువు, కానీ ఆమె దగ్గర డబ్బు లేదు.
ఆమె బోస్టన్‌లోని ఓల్డ్ స్టేట్ హౌస్ సమీపంలో ఒక వసతి గృహాన్ని ప్రారంభించింది. శాసనసభ్యులు అక్కడ బస చేసేవారు. వారు రాజకీయాల గురించి, బ్రిటన్‌తో పెరుగుతున్న ఉద్రిక్తతల గురించి మాట్లాడుకోవడం ఆమె విన్నది.
ఆమె తన అభిప్రాయాలను ఏర్పర చుకోవడం ప్రారంభించింది.
ఇంతలో, ఆమె సోదరుడు బెంజమిన్ ప్రపంచంలోనే అత్యంత ప్రసిద్ధ వ్యక్తులలో ఒకరిగా ఎదుగుతున్నాడు.
ముద్రకుడు. ప్రచురణకర్త. ఆవిష్కర్త. శాస్త్రవేత్త. దౌత్యవేత్త. వ్యవస్థాపక పితామహుడు.
మెరుపు అనేది విద్యుత్తు అని అతను కనుగొన్నాడు. అతను మెరుపు కడ్డీని, బైఫోకల్స్, ఫ్రాంక్లిన్ స్టవ్‌ను కనిపెట్టాడు.  ఆయన స్వాతంత్ర్య ప్రకటన ముసాయిదా తయారీలో సహాయపడ్డాడు. అమెరికా విప్లవానికి ఫ్రాన్స్ మద్దతును కూడగట్టాడు. పారిస్ ఒప్పందంపై చర్చలు జరపడంలో సహాయపడ్డాడు.
అమెరికా చరిత్రలోనే అత్యంత ప్రసిద్ధమైన ఆత్మకథలలో ఒకటైన తన ఆత్మకథను బెంజమిన్ ఫ్రాంక్లిన్ రాశాడు.
జేన్ తన జీవిత చరిత్రకు సంబంధించిన పద్నాలుగు పేజీల గ్రంథాన్ని రాసింది. దానికి ఆమె "యుగాల గ్రంథం" అని పేరు పెట్టింది. జననాలు. మరణాలు. నష్టాలు. బెంజమిన్ ఆత్మకథలో జేన్ ప్రస్తావన ఎక్కడా లేదు. కానీ అతను ఆమెకు ఉత్తరాలు రాశాడు, నిరంతరం.
ఆమె వివాహం జరిగిన సంవత్సరం 1727 నుండి, అతను మరణించిన సంవత్సరం 1790 వరకు, వారు అరవై మూడు సంవత్సరాల పాటు ఉత్తర ప్రత్యుత్తరాలు జరుపుకున్నారు.
బెంజమిన్ తన జీవితంలో జేన్‌కే ఎక్కువ ఉత్తరాలు రాశాడు.
అతని ఉత్తరాలలో చాలా వరకు లభించాయి. ఆమె రాసినవి చాలా వరకు లభించలేదు.
1758కి ముందు, జేన్ రచనలకు సంబంధించిన ఏకైక ఆధారం ఆ సన్నని 'యుగాల గ్రంథం' మాత్రమే. బెంజమిన్‌కు ఆమె రాసిన తొలి ఉత్తరాలు లభ్యం కాలేదు.
1770 నుండి 1774 వరకు ఆమె రాసిన ఉత్తరాలు కూడా లభ్యం కాలేదు.
లభించిన ఆధారాలు ఆమె తెలివైన, జిజ్ఞాస గల, రాజకీయంగా చురుకైన, నిరంతరం పోరాడిన మహిళ అని చెప్పేవి.
ఆమె తన పిల్లల అనారోగ్యాల గురించి రాసింది. అప్పుల గురించి రాసింది. తన కొడుకులను జైళ్లు, మానసిక ఆసుపత్రులకు వెళ్లకుండా కాపాడటానికి పడిన ప్రయత్నాల గురించి రాసింది. 
ఆమె రాజకీయాల గురించి రాసింది. మొదట్లో జాగ్రత్తగా, ఆ తర్వాత పెరుగుతున్న దృఢ విశ్వాసంతో.
అమెరికా విప్లవం ప్రారంభమైనప్పుడు, జేన్‌కు అరవై మూడు సంవత్సరాల వయస్సు.
1775 ఏప్రిల్‌లో, లెక్సింగ్‌టన్, కాంకర్డ్ యుద్ధాల తర్వాత, బ్రిటిష్ సైనికులు బోస్టన్‌లోకి తిరిగి పెద్ద సంఖ్యలో ప్రవేశించారు. మిలీషియా దళాలు నగరాన్ని చుట్టుముట్టాయి.
జేన్ పారిపోయింది. అరవైలలో ఉన్న ఒక వితంతువు, యుద్ధం నుండి శరణార్థిగా మారింది.
ఆమె మొదట రోడ్ ఐలాండ్‌కు వెళ్లి, స్నేహితులతో కలిసి ఉంది.
ఆ తర్వాత ఇంగ్లాండ్ నుండి తిరిగి వచ్చిన బెంజమిన్  తన కుటుంబంతో కలిసి జీవించడానికి ఆమెను ఫిలడెల్ఫియాకు తీసుకువచ్చాడు.
పదకొండు సంవత్సరాలలో వారు ఒకరినొకరు చూసుకోవడం అదే మొదటిసారి.
బెంజమిన్ ఒక దౌత్యపరమైన పని మీద ఫ్రాన్స్‌కు బయలుదేరాడు. జేన్,  బెంజమిన్ ఒకరినొకరు ప్రత్యక్షంగా చూసుకోవడం అదే చివరిసారి.
కానీ ఉత్తరాలు కొనసాగాయి.
బ్రిటిష్ వారు నగరాన్ని బెదిరించినప్పుడు జేన్ ఫిలడెల్ఫియా నుండి పారిపోవలసి వచ్చింది. ఆమె రోడ్ ఐలాండ్‌కు తిరిగి వెళ్లింది.
యుద్ధం ఆమె కుటుంబాన్ని ఛిన్నాభిన్నం చేసింది. ఆమె మనవడు అదృశ్యమయ్యాడు. బోస్టన్‌లోని ఆమె ఇల్లు దోపిడీకి గురైంది.
 ఆమె స్నేహితుల దయ, బెంజమిన్ పంపిన ఆర్థిక సహాయంపై ఆధారపడి, సురక్షితమైన ఆశ్రయం కోసం వెతుకుతూ నిరంతరం ఒక చోటు నుండి మరో చోటుకు మారుతూ ఉండేది.
యుద్ధం ముగిసినప్పుడు, జేన్ బోస్టన్‌కు తిరిగి వచ్చింది. 1784లో, ఆమె యూనిటీ స్ట్రీట్‌లోని ఒక ఇంట్లోకి మారింది.
ఆ ఇల్లు బెంజమిన్‌కు చెందినది.
అతను ఆమెను అక్కడ అద్దె లేకుండా నివసించడానికి అనుమతించాడు. అతను ఆమెకు సంవత్సరానికి యాభై పౌండ్లు పంపేవాడు. అది ఒక గణనీయమైన మొత్తం.
జేన్ చివరకు స్థిరపడింది. సురక్షితంగా ఉంది.
ఆమె బెంజమిన్‌కు ఇలా రాసింది: "నేను త్వరగా నిద్రపోతాను, వెచ్చగా, సౌకర్యవంతంగా పడుకుంటాను. ఉదయాన్నే మంచి మంట దగ్గర లేస్తాను, వెంటనే నా అల్పాహారం తీసుకుని మంచి ఆకలితో తింటాను, ఆపై చదువుకుంటాను లేదా పని చేసుకుంటాను... మేము పొదుపుగా జీవిస్తాము. మా రొట్టెలన్నీ మేమే కాల్చుకుంటాము. సాయంత్రం ఒక స్నేహితుడు కూర్చుని కాసేపు కబుర్లు చెబుతాడు...."
డెబ్బై ఆరు సంవత్సరాల వయస్సులో, జీవితకాలపు పేదరికం, పోరాటం తర్వాత, ఆమె సౌకర్యవంతంగా ఉంది.
మొదటి పదిహేడు మంది ఫ్రాంక్లిన్ పిల్లలలో, బెంజమిన్, జేన్ జీవించి ఉన్న చివరి ఇద్దరు తోబుట్టువులు.
వారి చివరి లేఖలలో, వారు కొన్నిసార్లు మరణాన్ని ప్రస్తావించారు.  వారిలో ఒకరు చనిపోయేలోపు, ఇద్దరూ పక్కపక్కనే నివసించాలని జేన్ ఆశించింది.
అది ఎన్నడూ జరగలేదు.
1790 ఏప్రిల్ 17న, బెంజమిన్ ఫ్రాంక్లిన్ ఫిలడెల్ఫియాలో మరణించారు. ఆయన వయస్సు ఎనభై నాలుగు సంవత్సరాలు.
ఆయన అల్లుడు రిచర్డ్ బాచె జేన్‌కు ఇలా రాశారు :
"ప్రియమైన, గౌరవనీయమైన మహారాణి గారు, మీ ఆప్యాయతతో నిండిన హృదయానికి తీవ్రమైన దుఃఖాన్ని కలిగించే ఒక విషయాన్ని మీకు తెలియజేయడం నా విధి."
బెంజమిన్ తన వీలునామాలో యూనిటీ స్ట్రీట్‌లోని ఇంటిని జేన్‌కు ఇచ్చారు. ఆమె మరణించే వరకు అక్కడే నివసించింది.
1794 మే 7న, జేన్ ఫ్రాంక్లిన్ మెకామ్ బోస్టన్‌లో మరణించింది. ఆమె వయస్సు ఎనభై మూడు సంవత్సరాలు.
మే 10న ఆమె ఇంట్లోనే అంత్యక్రియలు జరిగాయి.
చరిత్రకారిణి జిల్ లెపోర్ ఇలా రాశారు: "శోకసముద్రంలో మునిగిన వారు కొద్దిమందే ఉండి ఉంటారు. ఆమె ప్రేమించిన వారిలో దాదాపు అందరి కంటే ఎక్కువ కాలం జీవించింది."
ఆమె పన్నెండు మంది సంతానంలో పదకొండు మంది ఆమె కంటే ముందే మరణించారు. ఆమె కుమార్తె జేన్ కొల్లాస్ మాత్రమే ఆమె తర్వాత జీవించింది. 
జేన్ ఫ్రాంక్లిన్ మెకామ్‌ను ఎక్కడ ఖననం చేశారో ఎవరికీ తెలియదు.
యూనిటీ స్ట్రీట్‌లోని ఇంటిని 1939లో కూల్చివేశారు. దాని స్థానంలో పాల్ రెవరేకు ఒక స్మారక చిహ్నాన్ని నిర్మించారు.
రెండు వందల సంవత్సరాల పాటు, జేన్ ఫ్రాంక్లిన్ మెకామ్ దాదాపుగా విస్మరించారు.
ఆమె సోదరుడు అందరికన్నా ఎక్కువగా ఆమెకే ఉత్తరాలు రాసినప్పటికీ, అతని మరణానంతరం ప్రచురించిన అతని ఆత్మకథలో ఆమె ప్రస్తావన ఎక్కడా లేదు.
జారెడ్ స్పార్క్స్ అనే సంపాదకుడు ఆమె ఉత్తరాలను సేకరించి ప్రచురించాడు. అతను ఆమె స్వరాన్ని చెరిపివేస్తూ, ఆమె స్పెల్లింగ్, వ్యాకరణాన్ని "సరిదిద్దాడు".
బెంజమిన్ ఫ్రాంక్లిన్ పేరు తెలిసిన చాలా మందికి జేన్ గురించి తెలియదు.
ఆ తర్వాత 2013లో, హార్వర్డ్ చరిత్రకారిణి జిల్ లెపోర్, జేన్ ఫ్రాంక్లిన్ మెకామ్ జీవిత చరిత్ర అయిన 'బుక్ ఆఫ్ లైఫ్'ను ప్రచురించారు.
మిగిలి ఉన్న ఉత్తరాలు, 'బుక్ ఆఫ్ ఏజెస్', ఇంకా చెల్లాచెదురుగా ఉన్న ఆధారాల నుండి లెపోర్ జేన్ కథను ఒకచోట చేర్చారు.
ఆమె మరుగునపడిపోయిన ఒక జీవితాన్ని పునరుద్ధరించారు.
 జేన్ ఫ్రాంక్లిన్ మెకామ్ బెంజమిన్ ఫ్రాంక్లిన్‌కు 'రెండవ ప్రతిరూపం'—ఆయనకు అత్యంత సన్నిహితురాలు, ఆయనకు ఇష్టమైన ఉత్తర ప్రత్యుత్తరాల భాగస్వామి.
ఆమె మేధావి. జిజ్ఞాస గలది. రాజకీయంగా చురుకైనది. అన్నింటినీ తట్టుకుని నిలబడినది.
ఆమె పేదరికాన్ని, పదకొండు మంది పిల్లల మరణాలను, తన కుటుంబంలో మానసిక అనారోగ్యాన్ని, యుద్ధాన్ని, నిరాశ్రయతను, వైధవ్యాన్ని సహించింది.
ఆమె సబ్బులు తయారు చేసింది. ఇతరులను తన ఇంట్లో అద్దెకు ఉంచుకుంది. పిల్లలను, మనవలను పెంచింది. తన ప్రసిద్ధ సోదరుడికి రాజకీయాలు, తత్వశాస్త్రం, కుటుంబం, విశ్వాసం గురించి ఉత్తరాలు రాసింది.
బెంజమిన్ ఫ్రాంక్లిన్ చరిత్రలోనే అత్యంత ప్రసిద్ధ అమెరికన్లలో ఒకరిగా నిలిచారు.
జేన్ ఫ్రాంక్లిన్ మెకామ్ పన్నెండు మంది పిల్లలను పెంచింది, వారిలో పదకొండు మందికి అంత్యక్రియలు జరిపింది. అరువు తెచ్చుకున్న ఇంట్లో ఒంటరిగా మరణించింది.
బెంజమిన్ తన కథను తానే రాసుకున్నాడు. దాన్ని ప్రచురించాడు. అమరుడయ్యాడు.
జేన్ 'బుక్ ఆఫ్ ఏజెస్' అని పిలిచే ఒక పుస్తకంలో పద్నాలుగు పేజీలు రాసింది. జనన మరణాలను నమోదు చేస్తూ. ఇతరుల సంరక్షణలో గడిపిన జీవితపు రికార్డు.
చరిత్ర బెంజమిన్‌ను గుర్తుంచుకుంది.
చరిత్ర జేన్‌ను మరచిపోయింది.
ఆమె తక్కువ తెలివైనది అయినందువల్ల కాదు. ఆమె తక్కువ ఆసక్తికరమైనది అయినందువల్ల కాదు.
ఎందుకంటే ఆమె 1712లో ఆడపిల్లగా పుట్టింది.
ఎందుకంటే ఆమె ఎప్పుడూ పాఠశాలకు వెళ్ళలేదు.
ఎందుకంటే ఆమె చిన్న వయసులోనే పెళ్లి చేసుకుని, తన జీవితాన్ని పిల్లలను పెంచడంలో, సబ్బులు తయారు చేయడంలో, ఇతరులను తన ఇంట్లో ఉంచుకోవడంలో గడిపింది.
ఎందుకంటే స్త్రీల జీవితాలు నమోదు చేయడానికి యోగ్యమైనవిగా పరిగణించబడలేదు.
బెంజమిన్, జేన్‌ల మధ్య ఆరేళ్ల వయసు తేడా. ఇద్దరూ మేధావులే. ఇద్దరూ జిజ్ఞాసువులే. ఇద్దరూ రచయితలే.
ఒకరు వ్యవస్థాపక పితామహులలో ఒకరయ్యారు.
ఒకరు మరచిపోయారు.
ఆ తేడా ప్రతిభలో గానీ, తెలివిలో గానీ లేదు.
ఆ తేడా అవకాశంలో ఉంది.
బెంజమిన్ పదిహేడేళ్ల వయసులో పారిపోయాడు. తన సొంత మార్గాన్ని ఎంచుకున్నాడు. తన జీవితాన్ని తానే నిర్మించుకున్నాడు.
జేన్ పదిహేనేళ్ల వయసులో పెళ్లి చేసుకుంది. పన్నెండు మంది పిల్లలను కన్నది.  ఆమె తన జీవితాన్ని ఇతరులకు సేవ చేయడంలో గడిపింది.
అరవై మూడు సంవత్సరాల పాటు, వారు ఒకరికొకరు ఉత్తరాలు రాసుకున్నారు.
బెన్నీ -  జెన్నీ, ఒకరినొకరు ప్రేమించుకున్న ఇద్దరు తోబుట్టువులు. ఒకరిని ఒకరు తమ రెండో ఆత్మలుగా భావించుకున్నారు.
ఒకరు ప్రసిద్ధులు. మరొకరు విస్మృతికి గురయ్యారు. కానీ ఒక చరిత్రకారుడు జేన్ కథకు కూడా ప్రాముఖ్యత ఉందని నిర్ణయించే వరకు.
జేన్ ఫ్రాంక్లిన్ మెకామ్ జననం : మార్చి 27, 1712. మరణం: మే 7, 1794.
బెంజమిన్ ఫ్రాంక్లిన్ సోదరి. ఉత్తర ప్రత్యుత్తరాలు జరిపిన వ్యక్తి. జీవించి నిలిచిన వ్యక్తి.
ఆమె జీవితం గుర్తుంచుకోవడానికి అర్హమైనది.
బెంజమిన్ ఫ్రాంక్లిన్ సోదరి అతనికి 63 సంవత్సరాల పాటు ఉత్తరాలు రాసింది. అతను ప్రసిద్ధుడయ్యాడు. ఆమె పేదరికంలో పన్నెండు మంది పిల్లలను పెంచింది. వారిలో ఒకరు మాత్రమే ఆమె కంటే ఎక్కువ కాలం జీవించారు.