శ్రీ చైతన్య మహాప్రభువు: - యామిజాల జగదీశ్
 

శ్రీ చైతన్య మహాప్రభువుకు గోవర్ధనంపై ఉన్న అపారమైన ప్రేమ — గిరిరాజును శ్రీకృష్ణుడిగా భావించి హృదయానికి హత్తుకున్న మహాప్రభువు!!
దాదాపు ఐదు వందల ఏళ్ల క్రితం, శ్రీ చైతన్య మహాప్రభువు బృందావన ధామంలో శ్రీకృష్ణుడి లీలాస్థలాలను దర్శిస్తూ ఉండేవారు. ఓ రోజు రాధా కుండం దాటి ముందుకు సాగుతూ సుమనస సరోవరం చేరుకున్నారు. అక్కడి నుంచి గోవర్ధన పర్వతం కనిపించగానే ఆయన కృష్ణప్రేమలో మునిగిపోయారు. ఆనందం, భక్తి కలగలిసిన భావంతో ఆయన హృదయం పరవశించిపోయింది.
మహాప్రభువు వెంటనే నేలపై సాష్టాంగ నమస్కారం చేశారు. ఆ తర్వాత గోవర్ధనంలోని ఓ శిలను తీసుకుని తన హృదయానికి హత్తుకున్నారు. శ్రీకృష్ణుడిపై ప్రేమతో ఆయన తనను తాను మరిచిపోయారు. చుట్టూ ఏం జరుగుతుందో కూడా పట్టించుకో నంతగా భక్తిలో మునిగిపోయారు.
బ్రజవాసులు గోవర్ధనాన్ని శ్రీకృష్ణుడి దివ్య లీలలకు సాక్షిగా భావించి పూజిస్తారు. అలాంటి గిరిరాజులో మహాప్రభువు తన ఆరాధ్య దైవమైన శ్రీకృష్ణుడి ప్రియ స్వరూపాన్ని దర్శించారు.
ఆ తర్వాత ఆయన గోవర్ధన గ్రామానికి చేరుకుని శ్రీ హరిదేవుడిని దర్శించు కున్నారు. అక్కడ కూడా కృష్ణప్రేమతో నృత్యం చేయసాగారు. ఆయన భక్తి పారవశ్యాన్ని చూసేందుకు ప్రజలు పెద్ద సంఖ్యలో తరలివచ్చారు. ఆ రాత్రి మహాప్రభువు శ్రీ హరిదేవుడి ఆలయం లోనే విశ్రాంతి తీసుకున్నారు.
ఆ రాత్రి మహాప్రభువు మనసులో శ్రీగోపాలుడిని దర్శించుకోవాలనే కోరిక బలంగా కలిగింది. శ్రీగోపాలుడి విగ్రహం గోవర్ధన పర్వతంపై ఉన్న అన్నకూట గ్రామంలో కొలువై ఉంది.
అయితే మహాప్రభువు ఓ నిర్ణయం తీసుకున్నారు. తాను గోవర్ధన పర్వ తంపైకి ఎక్కకూడదని నిశ్చయిం చుకున్నారు.
ఆయనకు గోవర్ధనం అంటే కేవలం రాళ్లతో నిండిన కొండ కాదు. అది శ్రీకృష్ణుడికి అత్యంత ప్రియమైన దివ్య స్వరూపం. అందుకే ఆ పర్వతంపై కాలు పెట్టడానికి కూడా ఆయన ఇష్టపడలేదు.
కానీ ఇప్పుడు ఓ ప్రశ్న ఎదురైంది. పర్వతంపైకి ఎక్కకపోతే, అక్కడ కొలువై ఉన్న తన ప్రియమైన శ్రీగోపాలుడిని ఎలా దర్శించుకోవాలి?
ఇదిలా ఉండగా, అన్నకూట గ్రామంలో దాడి జరుగుతుందనే భయం వ్యాపించింది. గ్రామస్థులు శ్రీగోపాలుడి విగ్రహానికి ఎలాంటి అపాయం కలగకుండా కాపాడేందుకు, ఆయన్ని గాన్ఠులీ గ్రామానికి తీసుకెళ్లారు. అక్కడ ఓ బ్రాహ్మణుడి ఇంట్లో ఎవరికీ తెలియకుండా స్వామికి సేవలు చేయసాగారు.
గోవర్ధన ప్రదక్షిణలో కృష్ణప్రేమ పారవశ్యం
మరుసటి రోజు ఉదయం మహాప్రభువు మానసీ గంగలో స్నానం చేసి గోవర్ధన ప్రదక్షిణ ప్రారంభించారు.
గిరిరాజును చూస్తున్న కొద్దీ ఆయన హృదయం మళ్లీ కృష్ణప్రేమతో నిండిపోయింది. నృత్యం చేస్తూ గోవర్ధన మహిమను కీర్తించసాగారు.
ఆ సమయంలో ఆయన నోట వెలువడిన భావం ఎంతో అద్భుతమైనది.
శ్రీకృష్ణుడి భక్తులందరిలో గోవర్ధనుడు శ్రేష్ఠుడు. ఎందుకంటే శ్రీకృష్ణుడు, బలరాముడు, ఆవులు, దూడలు, గోపబాలురు ఆనందంగా ఉండేందుకు గోవర్ధనం నీటిని, పచ్చికను, గుహలను, పండ్లను, పూలను అందిస్తూ వారికి సేవ చేస్తుంది.
గోవర్ధనం కేవలం ఓ పర్వతం కాదు. శ్రీకృష్ణుడి లీలలకు నిలయమైన పవిత్ర క్షేత్రం. స్వయంగా తన ఆరాధ్య దైవానికి సేవ చేసే భాగ్యాన్ని పొందిన దివ్య స్వరూపం.
ఈ భావంతో మహాప్రభువు గోవర్ధనుడి మహిమను కీర్తిస్తూ ప్రదక్షిణ కొనసాగించారు.
ప్రదక్షిణ పూర్తయిన తర్వాత మహాప్రభువు గోవిందకుండలో స్నానం చేస్తున్నారు. ఆ సమయంలో ఓ శుభవార్త ఆయన చెవిన పడింది.
శ్రీగోపాలుడు గాన్ఠులీ గ్రామంలో కొలువై ఉన్నాడని తెలిసింది!
ఆ మాట వినగానే మహాప్రభువు ఆలస్యం చేయకుండా అక్కడికి చేరుకున్నారు.
శ్రీగోపాలుడి మనోహరమైన దివ్య రూపాన్ని చూడగానే ఆయన ఆనందానికి అవధులు లేకుండా పోయాయి. కృష్ణప్రేమలో పరవశించి నృత్యం చేయసాగారు. శ్రీకృష్ణుడి పవిత్ర నామాలను ఆలపిస్తూ సంకీర్తనలో మునిగిపోయారు.
వరుసగా మూడు రోజుల పాటు మహాప్రభువు శ్రీగోపాలుడిని దర్శించుకున్నారు.
నాలుగో రోజు శ్రీగోపాలుడు తిరిగి తన అసలు ఆలయానికి చేరుకున్నారు. మహాప్రభువు మాత్రం గోవర్ధన పర్వత పాదాల వద్దే ఉండిపోయారు.
ఈ విధంగా పర్వతంపైకి ఎక్కకుండానే తన ప్రియమైన శ్రీగోపాలుడిని దర్శించుకోవాలనే కోరిక ఆయనకు నెరవేరింది.
గోవర్ధనం అంటే మహాప్రభువుకు శ్రీకృష్ణుడే!
గోవర్ధనంలోని ఓ చిన్న శిలను హృదయానికి హత్తుకోవడం నుంచి, గిరిరాజు చుట్టూ ప్రదక్షిణ చేస్తూ ఆయన మహిమను కీర్తించడం వరకు — మహాప్రభువు ప్రతి చర్యలోనూ శ్రీకృష్ణుడిపై ఉన్న అపారమైన ప్రేమ కనిపిస్తుంది.
ఆయన దృష్టిలో గోవర్ధనం ఓ పర్వతం మాత్రమే కాదు.
అది శ్రీకృష్ణుడి లీలలకు పవిత్ర నిలయం. ఆయనకు అత్యంత ప్రియమైన దివ్య స్వరూపం. తన ఆరాధ్య దైవంతో ముడిపడిన ప్రతి వస్తువునూ భగవంతుడితో సమానమైన ప్రేమతో చూసే భక్తి భావానికి గోవర్ధనం ఓ గొప్ప నిదర్శనం.
భగవంతుడిపై నిజమైన ప్రేమ కలిగినప్పుడు, ఆయనకు ప్రియమైన ప్రతి వస్తువూ మనకు పవిత్రంగానే కనిపిస్తుంది. మహాప్రభువు గోవర్ధన ప్రేమ మనకు అందించే సందేశం ఇదే.
కామెంట్‌లు