జీవకోటికి పాఠాలు;- -గద్వాల సోమన్న,9966414580

తీరం చేరాలనే

అలల ఆరాటం చూడు

అపజయాలెదురైనా

వాటి పోరాటం చూడు

పుడమి పొరలు చీల్చుకుని

వచ్చే విత్తును చూడు

మట్టి తల్లితో వాటి

విలువైన పొత్తును చూడు

కలసికట్టుగా పామును

చంపే చీమలను చూడు

పొదుపు విలువను నేర్పే

వాటి క్రమశిక్షణ చూడు

ముద్ద కూడు తిని కాయు

కుక్క విశ్వాసం చూడు

తన కూతతో పల్లె నిదుర

లేపు కోడిపుంజును చూడు

జీవకోటికవి పాఠాలు

స్వీకరిస్తే లాభాలు

దిద్దుకున్న బాగుపడును

శ్రేష్టమైన జీవితాలు