నేను వేదన;-డా.టి.రాధాకృష్ణమాచార్యులు-9849305871

అది

పుట్టుక కాదు  

అమ్మ ప్రసవ వేదన

కదిలితేనే మొదలు బతుకు యాత్ర  ఎవరిదైనా

తొలి నవ్వు చాచిన రెక్కల పక్షి కోరిక ఎగిరే నింగి స్వేచ్ఛ నేను

ఆకులు ఆలపించే జోలపాట వింటే

తీరొక్క వలయం వ్యాసార్థ భ్రమణం తెలిసింది 

పడిలేవడమే బతుకు నిర్వచనమని 

నేను

ఒంటరనే కాబోలు అమ్మ తోడొచ్చింది  గూటిలో ఏకాకి కాదు మేము రుధిరకావ్యం రాసిన జంట కవులం

నేను

స్నేహాల చినుకులు పరిచిన చిత్తడి 

ఆత్మీయ హితగురువులు తెరిచిన గగనమంత కిటికి

జననం అర్థం బోధపడేసరికి నాలో 

ఉదయ రాగాలు మధ్యాహ్న గీతాలు నడిచేపోయె బిరబిర  

ఒడుదుడుకుల ఆటే సంగీతసంధ్య 

చీకటి సంద్రంలో చేరగ నిద్రాకాలం చేరువాయే 

నన్ను బతికించిన చల్లని చూపుల అలాయ్ బలాయ్ కీ

నన్ను నడిపిన ఆత్మీయ యాదోంకీ బారాత్ ఆలోచనలకూ  

వంచని తల వంచి అందించే

ఆత్మ నమస్సులు చిరుతడి గుండెతో

నాలో 

మానవీయ బీజం నాటిన

సమాజ సహస్ర హస్తాలకూ ధన్యవాదాలు

మానవత్వగవాక్షం తెరుచుకున్న మట్టి మనిషిని నేను

పుట్టడం సృష్టిలో అదీ

సంవేదనల మనిషిగా మరీ అద్భుతం

బాధలు ఒంపుకున్న పాట నేను 

అనంతనొప్పిని ఒడిసిపట్టిన చేదు గుళికను కూడా

ఈ పుట్టుకకు 

నిజమైన అర్థవంతమైన  గీతాంజలి నేనే