కాకి కథలు...:- --- కోమటిరెడ్డి బుచ్చిరెడ్డి- సెల్ : 9441561655

 లెక్కల మాస్టారు ఎనిమిదో తరగతిలోకి ప్రవేశించాడు.ముందు రోజు ఇచ్చిన లెక్కల గురించి వాకబు చేశాడు. కొంతమంది చేశారు మరి కొంతమంది చేయలేదు. లెక్కలు చేయని విద్యార్థులను ఒక్కొక్కరిని ఎందుకు చేయలేదో అడిగి తెలుసుకుంటున్నాడు. వాళ్లంతా   వివిధ కారణాలు చెప్పారు. మాస్టారుకు కోపం వచ్చింది. చెప్పిన కారణాలే చెప్పడంతో  విసుగు కలిగింది. ఓపిక నశించి మీ కాకి కథలు నా దగ్గర చెప్పొద్దు. అని హెచ్చరించాడు. అందులో తెలివైన విద్యార్థి లేచి "కాకి కథలు అంటే ఏమిటి? మాస్టారు" అని మెల్లగా అడిగాడు.
       కాకి కథలు అనే నానుడి జనం వాడుక నుండి వచ్చిన పదం. సరైన  జవాబు చెప్పకుండా లేనిపోని కారణాలు ఆపాదిస్తూ తప్పించుకోవడాన్ని కాకి కథలు అంటారని మాస్టారు విద్యార్థులకు చెప్పాడు. అంటే పరోక్షంగా  అబద్ధాలు చెప్పడం అని అర్థం. అంటే ఖచ్చితమైన కారణం, కరెక్ట్ సమాధానం చెప్పలేని స్థితి  అని మాస్టారు ఈ కింది కథను వివరంగా చెప్పాడు.
  
         పూర్వకాలంలో మొగల్ రాజు అక్బర్ ఉండేవాడు. ఆయన చాలా గొప్ప చక్రవర్తి. అతని వద్ద బీర్బల్ అనే తెలివైన మంత్రి ఉండేవాడు. బీర్బల్ చాలా చాకచక్యంగా  సమయస్ఫూర్తితో సమాధానాలు చెప్పేవాడు. తన శక్తియుక్తులతో  రాజుని మెప్పించేవాడు . ఒకరోజు అక్బర్ కు ఒక సందేహం కలిగింది. అదేమిటంటే రాజ్యంలో మొత్తం ఎన్ని కాకులు ఉంటాయో కరెక్ట్ లెక్క చెప్పమని అడిగాడు. బీర్బల్ వెంటనే ఏమాత్రం తడుముకోకుండా లక్ష 60 వేల కాకులు  ఉంటాయనిటక్కున చెప్పాడు. రాజుకు ఆశ్చర్యం వేసింది. కాకులను లెక్కపెట్టకుండా  లెక్కను అంత కరెక్ట్ గా ఎలా చెప్పావు అని బీర్బల్ ను అడిగాడు. కావాలంటే మీరు లెక్క పెట్టుకోవచ్చు. రాజు ఎలాగూ లెక్క వేయలేడని తెలుసు.
     
          ఒకవేళ నీ లెక్కకు ఎక్కువ ఉన్న తక్కువ ఉన్న నీవు ఓడిపోయినట్లే కదా! అని అక్బర్ అన్నాడు. దానిదేముంది. ఒకవేళ ఎక్కువగా ఉంటే  వేరే రాజ్యం కాకులు వచ్చి చేరవచ్చు. ఒకవేళ తక్కువగా ఉంటే మన రాజ్యం కాకులే వీరే రాజ్యం  లో వున్న చుట్టాల ఇంటికి వెళ్ళిపోవచ్చు అని సమర్థించుకుంటూ చమత్కారంగా చెప్పాడు. రాజుకు నవ్వొచ్చింది. బీర్బల్ తెలివికి అక్బర్ చక్రవర్తి ఎంతగానో మెచ్చుకున్నాడు.
         తనను తాను సమర్ధించుకుంటూ   సరైన కారణాలు చెప్పకుండా  వంకలు చెప్పడాన్ని కాకి కథలు అంటారని విద్యార్థులందరికీ విడమర్చి చెప్పాడు మాస్టారు. అప్పుడు గాని  కాకి కథలంటే ఏమిటో తెలిసిపోయింది.