నారద భక్తి సూత్రాలు:- సి.హెచ్. ప్రతాప్

 భక్తి సూత్రాలలో, నారద ముని భక్తి మార్గాన్ని వివరంగా అన్వేషిస్తాడు. భక్తి అంటే ఏంటని ప్రశ్నకు ఆయన ఒక సమాధానం ఇస్తాడు – "అతో అస్మిన్ పరం ప్రేమ రూపం" అని అంటాడు, అంటే భక్తి అనేది పరమ ప్రేమ రూపం అని అర్థం. ప్రేమ అనేది మనం జీవితం లో వివిధ రూపాల్లో చూస్తాం – కుటుంబం, సంపద, హోదా లాంటి వాటిలో. కానీ అవన్నీ తాత్కాలికమే. నారదుడి మాటల్లో, భక్తి అంటే ఆ తాత్కాలిక ప్రేమలను దాటి, ఎప్పటికీ ఉండే, శాశ్వతమైన ప్రేమ. అదే పరమ ప్రేమ అని ఆయన చెప్పారు. దివ్య మహర్షి నారదుడు తన ఉత్కృష్టమైన భక్తి సూత్రాల ద్వారా మానవాళికి అమరమైన దివ్యానందం అందరికీ జన్మహక్కు అని ఘోషించారు. ఆయన ప్రకటన ప్రకారం, ప్రతి మనిషి జీవన లక్ష్యం – దైవానందాన్ని అనుభవించడమే. ఈ దిశగా నారదుడు సూచించిన మార్గం భగవంతుని పట్ల కలిగే నిస్వార్థమైన ప్రేమ, అహంభావరహిత భక్తి.
భక్తి అనేది మనస్సును భగవంతుని మీద ఆరాధనగా నిలబెట్టే ఒక పవిత్ర భావన అని నారద భక్తి సూత్రాలలో తెలియజేయబడింది. ఇది ప్రేమతో కూడిన ఒక పవిత్రమైన బంధం. ఇది భయంతో కాక, విశ్వాసంతో, ఆకర్షణతో, ఆత్మసంపూర్తితో నిండినది. భక్తి ద్వారా మనిషి లోపలి ఆందోళనలను అధిగమించి, ఆధ్యాత్మిక శాంతిని పొందగలడు. ఇది ప్రతి హృదయానికీ అందుబాటులో ఉన్న దైవానుభూతి మార్గం. భక్తి మార్గం ద్వారా మనిషి తనను తాను మరిచి, భగవంతునిలో లీనమయ్యే స్థితికి చేరుకుంటాడు.ఈ భక్తి ప్రేమను పొందినవాడు ప్రతి చోటా ప్రేమను చూస్తాడు, వింటాడు, మాట్లాడతాడు, అనుభవిస్తాడు. ఇది శాంతియుతమైన, పరిపూర్ణమైన ప్రేమ. ఇది ఎవరినీ గాయపరచదు. భగవంతునిపై ప్రేమతోపాటు కోరికలు, ద్వేషం, అహంకారం వంటి వాటిని వదలాల్సిందే.
భక్తి ద్వారా అమరత్వాన్ని పొందొచ్చు. ఇది అమృత స్వరూపం. నిజమైన ఆనందం, నిత్య శాంతి, నిత్య తృప్తి – ఇవన్నీ భగవంతునిలోనే లభిస్తాయి. భౌతిక లోకంలో ఆనందం క్షణికమే.భక్తుడు భగవంతుని అనుగ్రహాన్ని పొందుతాడు. అతని మనస్సు లోతైన ప్రశాంతతతో నిండిపోతుంది. అతని చైతన్యం ఆధ్యాత్మిక శక్తిగా మారుతుంది. మంత్రశక్తి, సాధనశక్తి, ఉపాసనశక్తి అతనికి బలం ఇస్తాయి. భగవంతుని పాదాల నుండి నిగలే సత్త్వగుణం అతని మనస్సులో ప్రవహిస్తూ కోరికలన్నీ కరిగిపోతాయి.