కలొక్కటే :- డా.టి.రాధాకృష్ణమాచార్యులు

పక్క పక్కనే పక్కలో నిద్రకు మేం ఇద్దరం

చీకటి కదా 

రాత్రికి భయంలేదు

నన్ను నిద్రపోనీయదు 

వాన్నీ కుదురుగా కునుకు తీయనీదు 

ఇప్పుడిక్కడ చీకటి రాజ్యం ఏలుబడిగా 

అయినా, నిద్రకు చీకటిదోస్తీ ఏందో

ఏ అలికిడిలేని రాత్రి

మేం కలలుగనకుండా 

తప్పు తనదికాదంటూ చీకటి

రాత్రిపై 

రాత్రి మాత్రం నాదికాదని నిద్రపై నెపం

కోపం ముంచుకొచ్చేలోగా

భళ్ళున తెల్లారే 

చీకటీ రాత్రీ నిద్రా పరార్

కమ్మని కలొక్కటే నా గుండెనిండా