అవిగో నాలుగు అమృత హస్తాలు..?:- పోలయ్య కూకట్లపల్లి, -అత్తాపూర్, హైదరాబాద్

(పసికందుల పట్ల మానవతా భావంతో)

జో…లాలి…జో…లాలి…

లాలి నా చిట్టితల్లి…

లాలి నను గన్న తల్లి…

లాలి బంగారు తల్లి…

లాలి నా కల్పవల్లి…

అన్న "ధర్మదాత" చిత్రంలోని 

ఈ "లాలిపాటను" విన్న 

ప్రతి హృదయం ద్రవిస్తుంది…

కన్నీటి పర్యంతమౌతుంది..!

కారు చీకటే కాపురంగా...

శూన్యంలో సంసారం సాగిస్తూ…

వయసు వేడిలో మనసు మత్తెక్కి

పాడుబడిన గుడి వెనుక

గుబురు పొదల నీడలో

కళ్లు పొరలు కమ్మిన ఓ యువజంట 

పాపఫలితమే రెక్కలులేని పక్షిలా 

పొదల్లో చిక్కుకొని ఉంది...పాపం 

ముసిముసి నవ్వుల ఓ పసిపాప..!

ఔను…

తూర్పు తల్లికి 

పడమటి తండ్రికి

చీకటి కడుపులో పుట్టి

ఆకలేసి పాలకోసం కేకలేసే

అమ్మ ఒడిలో సేద తీరాలని

ఆశతో అర్రులు చాసే ఆ పసిపాపను 

అవిగో "అమృత హస్తాలు నాలుగు"

ఎత్తుకున్నాయి ఎదకు హత్తుకున్నాయి..!

అది ఆ పాప అదృష్టం 

నిజానికి ఆ పసిపాపకి...

ప్రాణం పోసినవారొకరు..

జన్మనిచ్చినవారొకరు...

పాలు పట్టినవారు...

ఆకలిని తీర్చినవారు...

అడుగులు నేర్పినవారు...

ప్రేమతో ఆశతో పెంచినవారొకరు…!

అందుకే జాలిలేకున్నా 

జన్మ నిచ్చిన ఆ పిరికితల్లికి వందనం..!

పసిపాపను పరిపూర్ణమైన 

ఆదిపరాశక్తిగా తీర్చిదిద్దిన

ఈ మాతృమూర్తికి...పాదాభివందనం..!