లోకం తీరు : - జగదీశ్ యామిజాల

ఎప్పుడో అప్పుడు

ఉపయోగపడుతుందనే 

ఉద్దేశముతో

ఏవేవో కొనేస్తుంటాం

కానీ

కొంత కాలం తర్వాత

అవేవీ పనికిరానివేనని

విసిరి కొడతాం

ఇలానే ఉంటుంది

కొందరితో పరిచయాలూ 

చనువూ మాటలూ

కోటలు దాటుతాయి

తీరా ఓ క్షణాన

పాతాళానికి తొక్కెస్తారీ 

మనుషులు

వాడుకున్నంతా వాడుకుని!!

ఇలాంటి వారిని

పసి కట్టడం తెలీకే 

చిక్కులన్నీనూ

ఇందుకు

నేనేమీ అతీతుడ్ని కాను

నాలోనూ ఉన్నాయి లోపాలు

నాలోనూ ఉన్నాయి పాపాలు

అందుకే 

ఓ మాట చెప్పాలని

ఉంది...

ఎవరినైనా 

ఎలా ఉన్నావని అడిగితే

ఏదో మీ పుణ్యమాని 

బాగున్నానని చెప్తే

అప్పుడు నేననుకుంటాను ఇలా...

నాకున్నదే

ఆవగింజంత పుణ్యం

అందులో అతనికెంత

దానం చేయాలా అని?!