ఆనంద తాండవమే...?:- కవి రత్న సాహిత్య ధీర సహస్ర కవి భూషణ్ పోలయ్య కూకట్లపల్లి -అత్తాపూర్ హైదరాబాద్

ఓ "జగడాలమారి"జంట" 

కలతల కాపురానికి...

అనురాగ గోపురానికి... 

ప్రేమ రంగు లద్దినప్పుడు...

అది సుఖశాంతుల సుందర మందిరమే..!

చిలిపి కలల శిలను శిల్పి 

సుందర శిల్పంగా చెక్కినప్పుడు...అది 

జీవంతొణికిసలాడే శిల్పకళా ప్రపంచమే..!

ఓ "మూగవీణ" నిన్న మూలన పడి నేడు 

తిరిగి తీగల్లో సరిగమలు పల్లవిస్తే...అది 

వీధుల్లో వినూత్న సంగీత విహారయాత్రే...

ఆ ఆలాపనకర్థం మధుర గానామృతమే..!

"ఓ పిచ్చిపిల్ల"...

నిన్న పరికిణీలో ఊరంతా తిరిగి

నేడు పెళ్లిపందిరిలో పూలపల్లకిలో

బంగారు ఆభరణాలతో...

పట్టు వస్త్రాలతో...

అతిలోక సుందరిగా 

దర్శనమిచ్చినప్పుడు...

ఆ ముస్తాబుకు మనసు 

మురిసిపోతే అది ఆనంద తాండవమే..!

ఓ నాన్న...తెచ్చిన సరుకులతో

ఓ అమ్మ...దమ్ము బిర్యానీ చేస్తే...

ఆ ఘుమఘుమలకే కడుపు నిండిపోతే 

ఇక ఆ రుచులకు"జిహ్వ జన్మ"ధన్యమే..!

ఓ "మొద్దు విద్యార్థి" క్లాసులో

గురువు శిక్షణలో 

స్పూర్తిని పొంది

స్కూల్ ఫస్ట్ వస్తే...

ఆ తల్లిదండ్రుల కళ్ళల్లో 

కురిసేది...ఆశీర్వాదపు హర్ష వర్షమే...

ఆ గురువు గుండెల్లో

పొంగేది...ఉప్పొంగేది గర్వపు గంగే..!

ఓ "కవి" కష్టపడి కవిత వ్రాస్తే 

అది పత్రికల్లో దర్శనమిస్తే...

ఆ కవితకది‌..."నిశ్చితార్థమే"..

ఆ లక్షల అక్షరాలు ఒక 

"కవితా సంపుటిగా" మారి

"పుస్తకావిష్కరణ" జరిగితే... 

"ఆ కవిత్వానికది..."కళ్యాణ శోభే"..!