"పరుల హితం: -బెహరా నాగభూషణరావు

సాహితీ కవి కళాపీఠం,

సాహితీ కెరటాలు,

==============

జీవితం — ఓ అనుభవ పాఠశాల;

జీవనం — ఓ ఒరవడి.

తల్లి ప్రేమతో అంకురించి,

తండ్రి మమకారంతో చిగురించి,

పాఠశాలనే సమాజంలో జ్ఞానాన్ని పొంది,

తన కోసమే కాక —

పరుల హితం కోసం,

సమాజాభివృద్ధి కోసం,

"పచ్చని తివాచీని పరచాలనే" లక్ష్యంతో,

వెనుతిరగక, ముందుకు సాగుతున్న సగటు మనిషి — అతను.

దయ, క్షమ, ప్రేమ, ఓర్మి, సహకారం —

అతని గుణాలు.

పలుకులో సత్యం,

పనిలో జయం,

సలహాలో విజయం —

అతని నైజాలు.

అతని వెలుగులు —

ఉషోదయ ప్రకాశం,

అతని ఆకాంక్ష —

శుక్లపక్ష చంద్రిక,

అతని సలహా —

చిగురిస్తున్న వసంతం.

అతని వాక్కు —

బ్రహ్మ వాక్కు.

అతని నిర్దేశం —

అంతరించే చీకటి.

అతని లక్ష్యం —

పులకరించే పృథ్వి.