ఓ నల్ల తుమ్మ!: - పంచదార్ల మాణిక్యాలరావు

 

పల్లవి:
 
ఓ నల్ల తుమ్మ - ఓ గడుసు తుమ్మ
పల్లె బ్రతుకున - పదిలమైన బొమ్మ
ముళ్ళను మోసిన - మునివన్నె రూపము
కల్మషము లేని - కమ్మని స్నేహము
                                                                         
                                       |ఓ నల్ల తుమ్మ||

                                    చరణం 1:
 
వానలో నిలిచే - ఓర్పు గుణశాలివి
ఎండలో విరిసే - శౌర్య బలశాలివి
బెరడు చాటున - కరుణ దాచావు
జిగురు తోడ - సిరిని పంచావు
                                   
                                           ||ఓ నల్ల తుమ్మ||

 
                                   చరణం 2:
 
చూడ కరుకైన - సుగుణ రాశివి
త్యాగ గుణమున - మునివన్నె దానివి
గొర్రెల కాపరి - కొంగు నీడవు
పశువుల మందకు - రక్షక తోడవు
 
                                            ||ఓ నల్ల తుమ్మ||

చరణం 3:
 
పల్లె వెలుగుకు - పచ్చ తోరణానివి
అలసిన వారికి - చల్ల దీవనానివి
పళ్ళు తోము - పుల్లవు నీవు
మట్టికి గట్టి - మనసువు నీవు
 
                                            ||ఓ నల్ల తుమ్మ||