మనిషి తత్వం ఒక అంతులేని అధ్యాయం : - సయ్యద్ సల్మా-B.LI.SC., M.A., M.ED-భద్రాచలం

సముద్రం లోతు కొలవగలం, ఆకాశం విశాలం చూడగలం,

మనిషి మనసు లోతులను మాత్రం పూర్తిగా తెలుసుకోలేం.

అనుభవాల అలలతో మారే అతని భావ ప్రపంచం,

అందుకే మనిషి తత్వం ఒక అంతులేని అధ్యాయం.

మనుషుల్లో రకరకాల తత్వాలు కనిపిస్తాయి,

కొన్ని హృదయాలు ప్రేమను పంచుతాయి, కొన్ని స్వార్థాన్ని పెంచుతాయి.

కానీ నిజమైన తత్వం మానవత్వంలో వికసిస్తుంది,

పరుల కష్టాల్లో అండగా నిలిచినప్పుడు పరిమళిస్తుంది.

"నేనున్నాను" అనే ఒక్క మాటలో ఎంతో బలం ఉంటుంది,

నిరాశలో ఉన్న మనసుకు అది ఆశాకిరణం అవుతుంది.

కన్నీటి వెనుక దాగిన బాధను అర్థం చేసుకున్న హృదయం,

నిజమైన మనిషితనానికి నిలువెత్తు రూపం.

మనిషి జన్మ ఒక అమూల్యమైన వరం,

మంచిని పంచడానికే లభించిన అపూర్వ అవకాశం.

మన వల్ల ఎంత చేయగలమో అంత చేయడం ధర్మం,

సాటి మనిషికి తోడుగా నిలవడమే జీవిత సార్థకం.

ధనం, పదవి, కీర్తి కాలంతో కలిసిపోతాయి,

కానీ చేసిన మంచి పనులు చిరకాలం నిలిచిపోతాయి.

ప్రేమ, దయ, కరుణలతో నిండిన హృదయం ఉంటే,

మనిషి జీవితం నిజమైన అర్థాన్ని పొందుతుంది.

ఒకరి బాధను తన బాధగా భావించిన క్షణమే,

మానవత్వం మనసులో వెలిగే పవిత్ర దీపమే.

మనిషి గొప్పతనం సంపదలో కాదు, సుగుణాలలో ఉంటుంది,

ప్రపంచం గుర్తుంచేది అతని మంచితనాన్నే.

మనిషిగా పుట్టడం అదృష్టం,

మనిషితనాన్ని నిలబెట్టడం మహోన్నతం.