బోనాలపండగ (పద్యం సీసమాలిక):-మమత ఐల-హైదరాబాద్-9247593432

మునుపు మూసీ నది ముంచేయ వరదతో

     సకల యత్నము జేసి శాంతి కొరకు

సింహవాహిని మాత సిరిగల తెల్లికి

     గుడికట్టి పూజించ గుర్తు గాను

శాంతించి నదిమాత సర్వశుభములిచ్చి

     విస్వసించిన జనావేధనలను

తొలగించు చుండగా ధూప దీప ములిడి

   బోనాలతో వచ్చె భువిన జనులు

జాతరే మొదలాయె జనసందడేర్పడి

   నాటి నుండి మొదలు నేటి వరకు

అమ్మ వారికి యతి యాప్తసోదరుడైన

     పోతురాజును భక్తి పూర్వకముగ

కొలచి వేషాలనే కూర్చి జాతరజేయ

   యాషాఢమాసాన యవని మెరిసి

వర్థిల్లె నుత్సవం వనితలపండగై

    హైదరాబాదున హంగు తోడ

 సింహాలదర్వాజ సంహరించేరూపు

    జాజురంగును వేసి జాతరలతొ 

తలచేరు తల్లిలాల్ దర్వాజ పేరును 

    నైజాము నిర్మించినందు వలన

ప్రఖ్యాతి గాంచెను ప్రతివత్సరంబున

     సందడి బోనాల సంబరాలు

ఆ.వె

పాలు నెయ్యితీపి పరమాన్న బోనము

వేప కొమ్మ శాఖ పెట్టి వేడ

భక్తితోడ జనులుబలగమై వచ్చేరు

మనసు పెట్టి వినుడి మమత మాట