సముద్ర తీరం పోతిమి --బాల గేయం :---ఎం. వి. ఉమాదేవి. నెల్లూరు.

సముద్ర తీరం చూచుటకూ 

అమ్మ వాళ్ళతో వెళ్ళాము 

పెద్ద పెద్ద అలల ఘోషా 

మొద్దబ్బాయికి భయమే వేసే!

ఇసుకలోను ఎండ్ర కాయలు 

ఇటు అటు పాకే చిన్నజీవులు 

గవ్వలు,శంఖాలున్నాయి 

పడవలు,వలలూ ఉన్నాయి !

ఎంత భయమో ఈ జలధి 

యుగ యుగాల వాన నిధి 

ఎండకి వెళ్లిన నీటి ఆవిరే 

మేఘమునందు వర్షాలు !

హైలెస్సా అని జాలరులు 

తెప్పలో వేటకి వెళ్లారు 

ఒడ్డున ఉంది లైట్ హౌసు 

చీకట్లోన దారి చూపు !

 పల్లీ,సమోసా తిన్నాము 

చెలిమలో నీరు తాగాము 

ఒంటె, గుర్రం ఎక్కాము 

పదిరూపీకే మహారాజై !

 పసుపు,కుంకుమ తాంబూలం 

అమ్మ జలధిలో వేసినది 

అందరు దండం పెట్టాము 

గవ్వల హారం కొన్నాము !

సముద్ర స్నానం జాగ్రత్త 

చిన్న అలలలో చేయండి 

చేయి చేయి పట్టుకొని 

కాలికి పట్టు చూసుకొని !

సముద్ర తీరం బాగుంది 

మళ్ళీ రమ్మని అడిగింది !