శిరోవేదన మథనం;-కవిరత్న నాశబోయిన నరసింహ(నాన), ఆరోగ్య పర్యవేక్షకులు, 8555010108.

ఒక్కోసారి మది పరిగెత్తే కుందేలు  

అలసి సొలసి ఆరోగ్యం కుదేలు 

సాధ్యాసాధ్యాలు దానికి అనవసరం

నీవుగా బతికితే అనంత ఆనందం

తోటివారితో పోలిక కుంగుబాటుకు మూలం !

నిన్ను నీవుగా అంచనా వేసుకో 

అత్యాశ లోతు తెలియని బురదకుంట  

అందమైన తామర పూలతో ఆకట్టుకుంటుంది

తలకు మించిన బరువైతే తప్పదు శిరో వేదన 

ప్రతి నిత్యం ధ్యానయోగతో బుద్ది వికాసం !

ప్రతి జీవికి కష్టాలు కన్నీళ్లు సహజం 

ఒక్కోసారి చుట్టుముట్టే సమస్యల వలయం                                       

మోయలేని భారంతో గుండె చెరువైతే

ఒత్తిడికి తడబడటం కాదు నిలబడటం నేర్వాలి !

చెట్టు చిగురించాలన్నా..! 

పండుటాకు రాలాలన్నా..!

శైశవం వృద్ధాప్యంగా మారాలన్నా..! 

నిలువెత్తు కాలానిదే నిర్ణయాధికారం

కాలం చేసిన గాయం మానని దేహాలెన్నో..!

ఎంత చదివినా ఒడవని కావ్యం అనంత విశ్వం !

ఆనందం ఆశ కవల పిల్లలు కాదు 

ఓ తీయని అనుభూతి ఆనందం

ఉన్నంతలో తృప్తిపడే తత్త్వం 

ఆశ కడదాక విషాదాన్ని మోసుకొస్తుంది ! 

నీలోని భావోద్వేగాల నియంత్రణ

ప్రతికూల ఆలోచనలకు ముగింపు

చేదు జ్ఞాపకాలకు పాడాలి చరమగీతం 

సరైన జీవనశైలి సమస్యల పరష్కారమార్గం !