సునంద భాషితం ;-వురిమళ్ల సునంద, ఖమ్మం

 తిరము... తీరము
   ******
ఏ పని చేయాలన్నా ముందుగా మానసికమైన ఒత్తిడి లేకుండా చూసుకోవాలి.మనసు ఎంత ప్రశాంతంగా తిరముగా ఉంటే అంత మంచి ఫలితం పొందవచ్చు.
మనసు,మాట ఇవి రెండూ తిరము లేని వారిపై ఎవరికీ నమ్మకం ఉండదు.
ఆలోచనల తిరమే ఆత్మ నిగ్రహానికి, ధ్యానపరమైన  స్థితప్రజ్ఞతకు దారి తీస్తుంది.
తిరము అంటే ఏమిటో చూద్దాం..స్థిరము, అకుంఠము, అచలము, శాశ్వతము,స్థైర్యము,నిచ్చలము, ధారణ, అచ్యుతము లాంటి అర్థాలు ఉన్నాయి.
కొంతమందికి ఎందులోనూ తిరము ఉండదు.తరచుగా అపజయాల పాలు అవుతుంటారు.  అలాంటి వారి జీవితము నడి  సంద్రంలో నావలా కనిపిస్తుంది.ఏ  దారి తెన్నూ  కానరాక అనుకున్న  లక్ష్య తీరమును చేరుకోలేరు.
జీవితం ఆనందాల హరివిల్లై విరబూస్తూ, ఆదర్శాల పరిమళాలు పంచుతూ, ఆత్మ తృప్తి తీరము చేరాలంటే మనసు  తిరముగా ,ఎలాంటి ఒడుదుడుకులనైనా అవలీలగా ఎదుర్కొనేలా ఉండాలి.
తీరము అంటే ఏమిటో చూద్దాం...ఒడ్డు,తటి,తటము,కూలము,దరి,పారము,గట్టు,ఉద్దరి,గడ్డ లాంటి అర్థాలతో పాటు నాగము,సత్తు, ప్రాంతము,ఆలీనము,తమరము, రంగము లాంటి అర్థాలు కూడా ఉన్నాయి.
మనసుకు ఉన్న శక్తి అమేయమైనది. ఆ మనస్సును తిరముగా చేసి కొని  అనుకున్నవి సాధిస్తూ అద్భుతాలను సృష్టించ వచ్చు, అందరిలో రాణించ వచ్చు.
సాయంకాల నమస్సులతో 🙏