సునంద భాషితం ;-వురిమళ్ల సునంద, ఖమ్మం

 న్యాయములు-34
కాకోలూక నిశా న్యాయము
*****
కాకము అంటే కాకి. ఉలూకము అంటే గుడ్ల గూబ. నిశా అంటే రాత్రి.
ఈ మూడింటిని కలిపి ఓ చక్కటి న్యాయమును సృష్టించిన మన పూర్వీకుల నిశిత దృష్టి ఎంత గొప్పదో కదా!దానిని మానవ జీవితానికి అన్వయింపజేసిన విధం చూస్తుంటే, ఎవరికైనా భలేగా అనిపిస్తుంది.
కాకి,ఉలూకమూ రెండూ పక్షులే అయినా రాత్రి పూట కాకికి కళ్ళు కనపడవు.గుడ్లగూబకు పగటి పూట కళ్ళు కనబడవు.
కాకి కేవలం పగటి పూటే స్వేచ్ఛగా తిరుగుతూ  ఆనందంగా ఉండగలుగుతుంది.కానీ రాత్రి పూట తిరగలేదు.అందుకే దానికి రాత్రి ఇబ్బందికరం.
అలాగే గుడ్లగూబకు పగటి వెలుతురులో కళ్ళు కనిపించవు.అది పగటి పూట ఎటూ తిరగలేదు.దానికి పగలు రాత్రితో సమానం. అంటే గుడ్ల గూబకు పగలు ఇబ్బందికరం అన్న మాట.
ఇలా ఒకరికి సంతోషం కలిగించే అంశం కానీ సందర్భం కానీ మరొకరికి బాధ కలగించడం,ఒకరికి బాధ కలిగించే విషయం మరొకరికి సంతోషం కలిగించడం... 
ఇలా ఒకే పరిస్థితి,ఒకే సందర్భం అనేది ఇరువైపులా ఓకే రకమైన అనుభవాలను ఇవ్వాలి.కానీ ఇలా ఒకరికి ఆనందం,మరొకరికి ఆవేదన కలిగించే సందర్భంలో  ఈ కాకోలూక నిశా న్యాయమును ఉదాహరణగా చెబుతుంటారు.
ప్రస్తుతం ఉపాధ్యాయ బదిలీలకు సంబంధించిన పరిస్థితులకు  ఈ "కాకోలూక నిశా న్యాయమును" చక్కగా వర్తింపజేసుకోవచ్చు.
ప్రభాత కిరణాల నమస్సులతో 🙏