సుప్రభాత కవిత ; -బృంద

కలలు కరిగిన చోట

కన్నుల పంటలు

రాలిన క్షణాల ముంగిట

కలల ముగ్గులు

ఏ క్షణాన ఏ మాయలు

ఎదురవుతాయో?

ఏ మోడు ఏ కారణంతో

చిగురిస్తుందో?

ఏ మనసుకు ఏ వైపు

ఓదార్పు దొరుకుతుందో!?

ఏ వ్యధకు ఎక్కడ

ఏ ఉపశమనమో??

ఏ పలకరింపు ఎవరికి

జీవితాశ కలిగించేనో??

చీకటి మూసిన వాకిట

ఎవరొచ్చి చిరుదివ్వె వెలిగిస్తారో?

ఆగిన ఆశల ఊపిరి

ఏ తొలకరికి జీవం పోసుకుంటుందో?

నిట్టూర్పుల మౌనంలో

ఏ నీలాంబరి జోలపాడేనో!

ఏ కథకు ఏది కొనసాగింపో

ఏది కొత్త మలుపో

దేనికి ఏది కొత్త బ్రతుకో

ఎవరికి తెలుసు????

జీవితం 

చదవక తప్పని పుస్తకం

తప్పక రాయాల్సిన పరీక్ష

కొన్నైనా కోరిన సమాధానాలు

తెచ్చే కొత్త ఉదయానికి

🌸🌸 సుప్రభాతం 🌸🌸