శిశువు......!!------శ్రీమతి సుగుణ.అళ్లాణి.

శంఖాల్లా మెలిదిరిగిన మెత్తని

చేతులలో  ఏం దాచుకొచ్చావు?

ఆల్చిప్పల్లాటి అందమైన నీలి

కన్నుల్లో ఏ కలను తెచ్చావు?

ఏ దేవునికి దూతవునీవు

మాకేం చెప్పాలని వచ్చావు?

బోసి నవ్వుల్లో బ్రహ్మాండాన్ని చూపించి

చక్రాల్లాగా కళ్లను తిప్పుతూ

ఏదో  చెప్పాలని చూస్తావు

అర్థం  చేసుకోలేని అజ్ఞానులమని

ముఖమంతా విప్పి నవ్వుతావు కదూ!

ఎందరు నిన్ను ఎత్తుకున్నా-

అమ్మ స్పర్శ తాకగానే ఆదమరచి పోతావు

అమ్మ మాట వినగానే అన్నీ మరిచిపోతావు

ఎక్కడ నేర్చావీ విద్య నీవు....?

ఉంగా ఉంగా భాష లో ఎన్నో కథలు చెప్తావు

హుక్కూ హుక్కూ అంటూ పాటలు పాడుతావు

చిట్టి బొజ్జలో చిరు ఆకలి చిటికెడు పాలతో తీరె

చిన్ని కనులకు నిదుర  అమ్మ జోల  తో సరి!

మొగ్గల వంటి పాదాలతో ముందడుగేయి

బంగరు భవితకు బాట వేయి

అందని ఎత్తుకు బావుటా ఎగిరేయి

అందరి

మనసులు రంజింపజేయి!!

                        ***